പണിമുടക്കില്‍ പോസ്റ്റ് ഓഫീസുകള്‍ നിശ്ചലമായി

തപാല്‍ ജീവനക്കാരുടെ അഖിലേന്ത്യാ പണിമുടക്ക് കാരണം സംസ്ഥാനത്തെ പോസ്റ്റ് ഓഫീസുകള്‍ നിശ്ചലമായി. പോസ്റ്റല്‍ സേവനങ്ങളൊന്നും നടക്കുന്നില്ല. പാസ്‍പോര്‍ട്ടും പരീക്ഷാ അഡ്മിഷന്‍ ടിക്കറ്റുമുള്‍പ്പെടെ അത്യാവശ്യ സാമഗ്രികള്‍ പലര്‍ക്കും കൈപ്പറ്റാന്‍ കഴിയാത്ത സാഹചര്യമാണുള്ളത്.

ഇതോടെ പോസ്റ്റ് ഓഫീസില്‍ നിന്ന് കിട്ടേണ്ട സേവനങ്ങള്‍ ലഭിക്കാതെ ദുരിത്തിലായിരിക്കുകയാണ് ജനങ്ങള്‍. ഗ്രാമീണ് ഡാക് സേവക് ജീവനക്കാരുടെ ശമ്പള വര്‍ധനവിനായി തപാല്‍ ജീവനക്കാര്‍ തുടങ്ങിയ സമരം മൂന്നാം ദിവസത്തിലേക്ക് കടന്നപ്പോഴേക്കും തപാല്‍ മേഖല സംസ്ഥാനത്ത് സ്തംഭിച്ച അവസ്ഥയിലാണ്.

8000 രൂപയില്‍ താഴെ വരുമാനമുള്ള ഗ്രാമീണ്‍ ഡാക് സേവക് ജീവനക്കാരുടെ ശമ്പളം 10000 രൂപയാക്കണമെന്നും മറ്റ് ആനുകൂല്യങ്ങള്‍ നല്‍കണമെന്നുമാണ് പ്രധാന ആവശ്യം. തീരുമാനമെടുക്കാന്‍ കേന്ദ്ര സര്‍ക്കാരും സമരം അവസാനിപ്പിക്കാന്‍ ജീവനക്കാരും തയാറാകാത്തതില്‍ ദുരിതത്തിലാകുന്നത് സാധാരണക്കാരാണ്.