ചെന്നൈ: പുറത്താക്കപ്പെട്ട എ ഐ എ ഡി എം കെ ജനറൽ സെക്രട്ടറി വി കെ ശശികലയുടെ ഭർത്താവ്
എം നടരാജൻ സി ബി ഐ കോടതിക്കു മുമ്പാകെ കീഴടങ്ങി. 1994ലെ നികുതി വെട്ടിപ്പു കേസുമായി ബന്ധപ്പെട്ടാണ് കോടതിയിൽ കീഴടങ്ങിയത്. യു കെയിൽ നിന്ന് ആഡംബര കാർ ഇറക്കുമതി ചെയ്തതുമായി ബന്ധപ്പെട്ടാണ് ഇത്.
നേരത്തെ, നടന്നിട്ടുള്ള വാദം കേൾക്കലിൽ ഒന്നും നടരാജൻ പങ്കെടുത്തിരുന്നില്ല. ആരോഗ്യപ്രശ്നങ്ങൾ ഉന്നയിച്ച് ആയിരുന്നു വാദത്തിന് എത്താതിരുന്നത്. 2010 ജനുവരിയിൽ സി ബി ഐ സ്പെഷ്യൽ കോടതി നടരാജനെയും മറ്റ് മൂന്നുപേരെയും രണ്ടു വർഷത്തെ തടവിന് ശിക്ഷിച്ചിരുന്നു.
കഴിഞ്ഞവർഷം നവംബറിൽ മദ്രാസ് ഹൈക്കോടതി വിധി സ്ഥിരീകരിക്കുകയും ചെയ്തു. 1994ൽ നിയമവിരുദ്ധമായി നടരാജൻ ലെക്സസ് ആഡംബര കാർ യുകെയിൽ നിന്ന് ഇറക്കുമതി ചെയ്തിരുന്നു. ഇറക്കുമതി ചുങ്കത്തിൽ നിന്ന് ഒഴിവ് ലഭിക്കുന്നതിനു ഇത് ഉപയോഗിച്ച കാർ ആണെന്നുള്ള വ്യജ രേഖകൾ സമർപ്പിക്കുകയായിരുന്നു.