പദ്മാവതി വിദേശ റിലീസ് തടയാനാവില്ലെന്ന് സുപ്രീം കോടതി

ന്യൂഡൽഹി: സഞ്ജയ് ലീല ബൻസാലി ചിത്രം പദ്മാവതിയുടെ വിദേശത്തെ റിലീസ് നിരോധിക്കണമെന്നാവശ്യപ്പെട്ടുള്ള ഹര്‍ജി സുപ്രീം കോടതി തള്ളി.അഭിഭാഷകനായി മനോഹര്‍ ലാൽ ശര്‍മ സമര്‍പ്പിച്ച രണ്ടാമത്തെ ഹര്‍ജിയും തള്ളിയ കോടതി ഉത്തരവാദിത്തപ്പെട്ട സ്ഥാനങ്ങളിൽ ഇരിക്കുന്നവര്‍ ഇത്തരം വിഷയങ്ങളിൽ അഭിപ്രായം പറയരുതെന്ന് വിമര്‍ശിച്ചു. വിഷയത്തിൽ എതിര്‍പ്പുമായെത്തിയ വിവിധ സംസ്ഥാനങ്ങളിലെ മുഖ്യമന്ത്രിമാര്‍ക്കുള്ള താക്കീതു കൂടിയാണ് സുപ്രീം കോടതി വിധി.

ചിത്രം പരിശോധിച്ച് സെൻസര്‍ ബോര്‍ഡ് സര്‍ട്ടിഫിക്കറ്റ് നല്‍കരുതെന്ന് ഉത്തരവാദിത്തപ്പെട്ട സ്ഥാനങ്ങിൽ ഇരിക്കുന്നവര്‍ക്ക് എങ്ങനെ സാധിക്കുമെന്ന് കോടതി ചോദിച്ചു. ഇത് നിയമവിരുദ്ധമാണെന്നതിനു പുറമെ വിഷയത്തെ മുൻവിധിയോടെ സമീപിക്കാൻ സെൻസര്‍ ബോര്‍ഡിനെ പ്രേരിപ്പിക്കുമെന്നും കോടതി നിരീക്ഷിച്ചു.

ഗുജറാത്ത്, ഉത്തര്‍പ്രദേശ്, മധ്യപ്രദേശ് സംസ്ഥാനങ്ങളിലെ മുഖ്യമന്ത്രിമാരായിരുന്നു ചിത്രത്തിന്‍റെ റിലീസിനെതിരെ രംഗത്തു വന്നത്. ചിത്രത്തിലെ ആക്ഷേപാര്‍ഹമായ ഭാഗങ്ങള്‍ മാറ്റിയ ശേഷം മാത്രമേ റിലീസ് ചെയ്യാവൂ എന്ന് രാജസ്ഥാൻ മുഖ്യമന്ത്രി വസുന്ധര രാജ് സിന്ധ്യയും അഭിപ്രായപ്പെട്ടിരുന്നു. ഡിസംബര്‍ ഒന്നിനു നിശ്ചയിച്ചിരുന്ന ചിത്രത്തിന്‍റെ റിലീസ് അനിശ്ചിതമായി നീളുകയാണ്.