ലോയ കേസ്: പ്രത്യേക അന്വേഷണസംഘം വേണ്ടെന്ന് സുപ്രീം കോടതി

ന്യൂഡൽഹി: ജസ്റ്റിസ് ലോയയുടെ മരണം സംബന്ധിച്ച അന്വേഷണത്തിന് പ്രത്യേക സംഘത്തിന്‍റെ ആവശ്യമില്ലെന്ന് സുപ്രീം കോടതി. പ്രത്യേക അന്വേഷണസംഘത്തെ ആവശ്യപ്പെട്ടുള്ള എല്ലാ ഹര്‍ജികളും കോടതി തള്ളി. ജസ്റ്റിസ് ലോയയുടെ മരണത്തിൽ അസ്വാഭാവികതയില്ലെന്നും കോടതി പറഞ്ഞു.

ചീഫ് ജസ്റ്റിസ് ദീപക് മിശ്ര അധ്യക്ഷനായ മൂന്നംഗ ബെഞ്ചാണ് ഹര്‍ജികള്‍ തള്ളിയത്. ജസ്റ്റിസ് ഡി വൈ ചന്ദ്രചൂഡ്, എ എം ഖന്‍വില്‍ക്കര്‍ എന്നിവരാണ് ബെഞ്ചിലെ മറ്റ് അംഗങ്ങള്‍.

മരണത്തിൽ ദുരൂഹതയുണ്ടെന്നും സ്വതന്ത്ര അന്വേഷണം വേണമെന്നും ആവശ്യപ്പെട്ട് മഹാരാഷ്ട്രയിലെ മാധ്യമപ്രവര്‍ത്തകന്‍ ബി.ആര്‍. ലോനെ, കോണ്‍ഗ്രസ് നേതാവ് തെഹ്സീന്‍ പൂനാവാല എന്നിവര്‍ ഉള്‍പ്പെടെ സമര്‍പ്പിച്ച അഞ്ച് ഹര്‍ജികളാണ് കോടതി തള്ളിയത്.

ഗൂഢലക്ഷ്യങ്ങളോടു കൂടിയുള്ള ഹര്‍ജികള്‍ നിരുത്സാഹപ്പെടുത്തണമെന്നും ഹര്‍ജിക്കാര്‍ ജുഡീഷ്യറിയെ സംശയത്തിന്‍റെ നിഴലിലാക്കാൻ ശ്രമിച്ചുവെന്നും കോടതി പറഞ്ഞു. ലോയയുടെ മരണവുമായി ബന്ധപ്പെട്ട് ജഡ്ജിമാരായ ശ്രീകാന്ത് കുല്‍ക്കര്‍ണി, ശ്രീരാം മോദക്, ആര്‍ റാഠി, വിജയകുമാര്‍ ബര്‍ദെ എന്നിവര്‍ നല്‍കിയ മൊഴി അവിശ്വസിക്കേണ്ട കാര്യമില്ലെന്നു കോടതി നിരീക്ഷിച്ചു.