ബിജെപിക്ക് കനത്ത തിരിച്ചടി; മഹാരാഷ്ട്രയിലെ മുതിർന്ന നേതാവ് എൻസിപിയിലേക്ക്

മുംബൈ: മഹാരാഷ്ട്ര ബിജെപിയ്ക്ക് കനത്ത തിരിച്ചടിയായി മുതിർന്ന നേതാവും മുന്‍ മന്ത്രിയുമായ എക്‌നാഥ് ഖഡ്‌സെ എൻസിപിയിലേക്ക്. ഖഡ്സെ ബിജെപിയിൽ നിന്ന് രാജിവെച്ചെന്നും വെള്ളിയാഴ്ച എന്‍സിപിയില്‍ ചേരുമെന്നും പാർട്ടി സംസ്ഥാന അധ്യക്ഷനും മഹാരാഷ്ട്രയിലെ മന്ത്രിയുമായ ജയന്ത് പാട്ടിലാണ് പറഞ്ഞത്.

താൻ ബിജെപി വിട്ട് എൻസിപിയിൽ ചേരുമെന്ന് ഖഡ്സെ നേരത്തെ തന്നെ തന്നോട് പറഞ്ഞിരുന്നെന്നാണ് ജയന്ത് പാട്ടീൽ പറയുന്നത്. 'ബിജെപിയിൽ അദ്ദേഹത്തെപ്പോലുള്ള ഒരു മുതിർന്ന നേതാവ് നേരിട്ട അനീതി സംസ്ഥാനം മുഴുവൻ കണ്ടു. അദ്ദേഹം എൻസിപിയിൽ ചേരുന്നത് തീർച്ചയായും നമ്മുടെ പാർട്ടിയെ സഹായിക്കും' പാട്ടീൽ പറഞ്ഞു.

Also Read : കർണാടക ഉപതെരഞ്ഞെടുപ്പും വിമത നീക്കവും, മുഖ്യമന്ത്രി സ്ഥാനത്ത് നിന്ന് യെദ്യൂരപ്പ പുറത്തേക്കോ?

ദേവേന്ദ്ര ഫഡ്നാവിസ് മന്ത്രിസഭയിലെ രണ്ടാമനായിരുന്ന ഖഡ്സെ അഴിമതി ആരോപണത്തെ തുടർന്ന് 2016ലായിരുന്നു മന്ത്രിസഭയിൽ നിന്ന് രാജിവെച്ചത്. അന്ന് മുതൽ പാർട്ടിയിൽ തുടരുന്നതിൽ ഏക്നാഥ് ഖഡ്സെ അതൃപ്തനായിരുന്നുവെന്നാണ് റിപ്പോര്‍ട്ടുകള്‍.

ഖഡ്സെ വെള്ളിയാഴ്ച ഉച്ചയ്ക്ക് രണ്ട് മണിയ്ക്ക് പാർട്ടി പ്രവേശനം നടത്തുമെന്നാണ് ജയന്ത് പാട്ടീൽ വ്യക്തമാക്കിയിരിക്കുന്നത്. ഖഡ്‌സെ പാര്‍ട്ടിവിടുമെന്നത് സംബന്ധിച്ച അഭ്യൂഹം നേരത്തെ ദേവേന്ദ്ര ഫഡ്‌നാവിസ് തള്ളിയിരുന്നു. ഇതിന് പിന്നാലെയാണ് അദ്ദേഹം എന്‍സിപിയില്‍ ചേരുമെന്ന് ജയന്ത് പാട്ടീല്‍ വ്യക്തമാക്കിയത്.

Also Read : 'ഇസ്ലാമിക ശിരോവസ്ത്രത്തെ അപമാനിച്ചു'; പള്ളിയ്ക്ക് മുന്നിലൂടെ സൈക്കിൾ ചവിട്ടിയ യുവതി ഇറാനിൽ അറസ്റ്റിൽ

നേരത്തെ ഖഡ്സെ മുഖ്യമന്ത്രി ഉദ്ധവ് താക്കറെയുമായി കൂടിക്കാഴ്ച നടത്തിയതോടെ ഇദ്ദേഹം ശിവസേനയിൽ ചേർന്നേക്കുമെന്ന അഭ്യൂഹങ്ങളും ഉയർന്നിരുന്നു. പാർട്ടി വിടാനുള്ള തീരുമാനത്തിന് പിന്നാലെ ദേവേന്ദ്ര ഫഡ്നാവിസിനെതിരെ രൂക്ഷവിമർശനമാണ് ഖഡ്സെ നടത്തിയത്. തന്‍റെ ജീവിതം നശിപ്പിച്ചത് ഫഡ്‌നാവിസ് ആണെന്ന് അദ്ദേഹം ആരോപിച്ചു.