ഗോവയിൽ കോൺഗ്രസിന് കനത്ത തിരിച്ചടി; മുൻ മുഖ്യമന്ത്രി പാർട്ടിവിട്ട് തൃണമൂലിലേക്കെന്ന് റിപ്പോർട്ട്

പനാജി: ഗോവ മുന്‍ മുഖ്യമന്ത്രിയും മുതിര്‍ന്ന കോണ്‍ഗ്രസ് നേതാവുമായ ലുസിഞ്ഞോ ഫലേറോ പാർട്ടി വിടാൻ ഒരുങ്ങുന്നതായി റിപ്പോർട്ട്. ലുസിഞ്ഞോ ഫലേറോ കോണ്‍ഗ്രസ് വിട്ട് തൃണമൂലില്‍ ചേരാനൊരുങ്ങുന്നെന്നാണ് റിപ്പോർട്ട്. ഇത് ചർച്ചയാകുന്നതിനിടെ ഫലേറോ എം എൽ എ സ്ഥാനം രാജിവെക്കുകയും ചെയ്തു. താൻ കോൺഗ്രസ് ആശയങ്ങൾ ഉപേക്ഷിക്കുകയില്ലെന്നും മുതിർന്ന നേതാവ് പറഞ്ഞു.

നവേലിം മണ്ഡലത്തില്‍ നിന്നുള്ള കോൺഗ്രസ് എം എല്‍ എയായ ലുസിഞ്ഞോ ഫലേറോ ഗോവ അസംബ്ലി സ്പീക്കർ രാജേഷ് പട്നേക്കറിനാണ് രാജി സമർപ്പിച്ചത്. അടുത്ത വർഷം നിയമസഭ തെരഞ്ഞെടുപ്പ് നടക്കാനിരിക്കുന്ന ഗോവയിൽ മുതിർന്ന നേതാവിന്‍റെ നീക്കം കോൺഗ്രസിന് കനത്ത തിരിച്ചടിയാകുമെന്നാണ് വിലയിരുത്തപ്പെടുന്നത്.

Also Read : രാഹുലിന്‍റെ മുൻ വിശ്വസ്തൻ യോഗി മന്ത്രിസഭയിൽ; യുപിയിൽ ഏഴുപേർ മന്ത്രിമാരായി സത്യപ്രതിജ്ഞ ചെയ്തു

ഫലേറോയുടെ രാജി സ്വീകരിച്ചതായി സ്പീക്കർ ടൈംസ് ഓഫ് ഇന്ത്യയോട് പ്രതികരിച്ചു. താൻ കോൺഗ്രസ് വിടില്ലെന്നും കോൺഗ്രസ് കുടുംബത്തിൽ തന്നെ ഉണ്ടാകുമെന്നുമാണ് ഫലേറോയുടെ പ്രതികരണം. കോൺഗ്രസ് കുടുംബത്തെ സംസ്ഥാനത്തും രാജ്യത്തും കെട്ടിപ്പടുക്കുന്നതിന് പ്രവർത്തിക്കുന്നതിനായാണ് എംഎൽഎ സ്ഥാനം രാജിവെച്ചതെന്നും അദ്ദേഹം പറഞ്ഞു.

കോൺഗ്രസ് ആരുടെയെങ്കിലും ഒരാളുടേതല്ലെന്നും മഹാത്മാ ഗാന്ധി, ജവഹർലാൽ നെഹ്റു, ഇന്ദിരാ ഗാന്ധി തുടങ്ങിയവരുടെ നേതൃത്വത്തിലുണ്ടായ ഒരു പ്രസ്ഥാനമാണെന്നും ഫലേറോ പറയുന്നു. ഈ കോൺഗ്രസ് കുടുംബം ഇന്ന് വിഭജിക്കപ്പെട്ടിരിക്കുകയാണെന്നും ഗോവ മുൻ മുഖ്യമന്ത്രി ചൂണ്ടിക്കാട്ടി. പശ്ചിമ ബംഗാൾ മുഖ്യമന്ത്രി മമതാ ബാനർജിയുടെ ഒരു കോൺഗ്രസ് പാർട്ടിയുണ്ട്. വൈഎസ്ആർ കോൺഗ്രസ്, എൻസിപി നേതാവ് ശരത് പവാർ എന്നിവരുടേതായ കോൺഗ്രസും ഉണ്ടെന്നും അദ്ദേഹം പറഞ്ഞു.

Also Read : 25 ലക്ഷം കൈമാറിയത് സുധാകരന്‍റെ സാന്നിധ്യത്തില്‍; ഡൽഹിയിലെ വിഷയങ്ങൾ പരിഹരിക്കാമെന്ന് വാഗ്ദാനം; കെ സുധാകരന്‍ മോന്‍സന്‍റെ തട്ടിപ്പിന് സഹായിച്ചെന്ന് പരാതി

“ഞാൻ കോൺഗ്രസ് വിട്ടിട്ടില്ല. കോൺഗ്രസ് തത്ത്വചിന്ത, കോൺഗ്രസ് പ്രത്യയശാസ്ത്രം, കോൺഗ്രസ് തത്വങ്ങൾ, കോൺഗ്രസ് പരിപാടികൾ എന്നിവ എനിക്ക് പ്രിയപ്പെട്ടതായിരിക്കും,” അദ്ദേഹം കൂട്ടിച്ചേർത്തു. ദീര്‍ഘകാലമായി നവേലിം മണ്ഡലത്തെയാണ് ഫലേറോ പ്രതിനിധീകരിക്കുന്നത്. ഗോവയുടെ മുഖ്യമന്ത്രിയായും പ്രവർത്തിച്ചു. അടുത്തവർഷം സംസ്ഥാനത്ത് ഭരണത്തിൽ തിരിച്ചെത്താൻ കോൺഗ്രസ് ശ്രമിക്കുന്നതിനിടെയാണ് മുതിർന്ന നേതാവിന്‍റെ നാടകീയ നീക്കങ്ങൾ.