ഭരണഘടനാ ബെഞ്ചിൽ നിന്ന് മുതിർന്ന ജഡ്‌ജിമാരെ ഒഴിവാക്കി

ന്യൂഡൽഹി: ജഡ്‌ജിമാരുടെ പ്രതിഷേധത്തിന് ശേഷം കൊളീജിയത്തിലെ അംഗങ്ങളായ നാല് മുതിർന്ന ജഡ്‌ജിമാരെ ഭരണഘടനാ ബെഞ്ചിൽ നിന്ന് ഒഴിവാക്കി. ആധാർ, ശബരിമല, സ്വവർഗരതി തുടങ്ങിയ നിർണായക കേസുകളാണ് നിലവിൽ ബെഞ്ചിന് മുൻപിലുള്ളത്. ഇവ പരിഗണിക്കുന്നതിൽ നിന്നാണ് മുതിർന്ന ജഡ്‌ജിമാരെ ഒഴിവാക്കിയത്.

സുപ്രീം കോടതി ചീഫ് ജസ്റ്റിസ് ദീപക് മിശ്രയുടേതാണ് ജഡ്‌ജിമാരെ ഒഴിവാക്കാനുള്ള തീരുമാനം. എ.കെ സിക്രി, എ.എം.ഖാൻവിൽക്കർ, ഡി.വൈ.ചന്ദ്രചൂഡ്, അശോക് ഭൂഷൺ എന്നിവരെയാണ് ഭരണഘടനാ ബെഞ്ചിൽ ഉൾപ്പെടുത്തിയിരിക്കുന്നത്. ചീഫ് ജസ്റ്റിസ് നിർണായക കേസുകൾ കൈകാര്യം ചെയ്യുന്ന രീതിക്കെതിരെ പ്രതിഷേധിച്ചു കൊണ്ടാണ് നാലു മുതിർന്ന ജഡ്‌ജിമാർ കഴിഞ്ഞ ദിവസം രംഗത്ത് എത്തിയത്. പ്രതിഷേധം മാധ്യമങ്ങളിലൂടെ ജനമധ്യത്തിലേക്ക് എത്തിയതിനെ തുടർന്നാണ് ചീഫ് ജസ്റ്റിസിന്‍റെ പുതിയ നടപടി.