റെയില്‍വെ ട്രാക്കില്‍ ഉറങ്ങിയ 16 കുടിയേറ്റ തൊഴിലാളികള്‍ ട്രെയിനിടിച്ച് മരിച്ചു

ഔറംഗബാദ്: റെയില്‍വെ ട്രാക്കില്‍ ഉറങ്ങുകയായിരുന്ന 16 കുടിയേറ്റ തൊഴിലാളികള്‍ ട്രെയിന്‍ തട്ടി മരിച്ചു. മഹാരാഷ്ട്രയിലെ ഔറംഗബാദില്‍ ഇന്ന് പുലര്‍ച്ചെ 5.15 ഓടെയാണ് അപകടം ഉണ്ടായത്.




കുട്ടികള്‍ ഉള്‍പ്പെടെ 16 കുടിയേറ്റ തൊഴിലാളികളാണ് റെയില്‍വെ ട്രാക്കില്‍ കിടന്നുറങ്ങിയത്. ജല്‍നയ്ക്കും ഔറംഗബാദിനും ഇടയ്ക്ക് ഓടുന്ന ചരക്ക് തീവണ്ടി ഇടിച്ചാണ് അപകടം.


കര്‍മാട് പോലീസ് സ്‌റ്റേഷന്‍ പരിധിയിലുള്ള ഔറംഗബാദ്- ജല്‍ന റെയില്‍വെ ലൈനിലാണ് അപകടം ഉണ്ടായത്. ലോക്ക് ഡൗണിനെ തുടര്‍ന്ന് മധ്യപ്രദേശിലേക്കു മടങ്ങുകയായിരുന്നു തൊഴിലാളികള്‍. റെയില്‍വെ സംരക്ഷണ സേനയും പോലീസും സ്ഥലത്തെത്തി രക്ഷാപ്രവര്‍ത്തനം നടത്തി.

ജല്‍നയിലെ ഉരുക്ക് ഫാക്ടറിയിലെ തൊഴിലാളികളാണ് മരിച്ചവരെന്നാണ് വിവരം. നാട്ടിലേക്കു പോകാനുള്ള ട്രെയിന്‍ പിടിക്കുന്നതിനായി ജല്‍ന മുതല്‍ 170 കിമീ അകലെയുള്ള ഭുവാസല്‍ വരെ ഇവര്‍ നടക്കുകയായിരുന്നു. 45 കിമീ പിന്നിട്ടതിനു ശേഷം ട്രാക്കില്‍ വിശ്രമിക്കുന്നതിനിടെയാണ് അപകടം ഉണ്ടായതെന്ന് ഔറംഗബാദ് എസ് പി പറഞ്ഞു.