നരേന്ദ്ര മോദിക്കെതിരെ ആഞ്ഞടിച്ച് ശരദ് പവാർ

നാഗ്‌പൂർ: പ്രധാനമന്ത്രിയുടെ ഓഫീസിനെ മോദി തന്‍റെ പരാമർശത്തിലൂടെ തരാം താഴ്ത്തിയെന്ന് എൻസിപി ദേശീയാധ്യക്ഷൻ ശരദ് പവാർ. മുൻ പ്രധാനമന്ത്രി മൻമോഹൻ സിങ്ങിനെതിരെയുള്ള മോദിയുടെ പരാമർശത്തെയാണ് പവാർ പരിഹസിച്ചത്. ഈ രാജ്യത്തെ മുൻപ്രധാനമന്ത്രിക്കെതിരെയും പ്രതിരോധ ഉദ്യോഗസ്ഥൻമാർക്കെതിരെയുമാണ് താങ്കൾ ആരോപണം ഉന്നയിക്കുന്നതെന്ന് ഓർക്കണമെന്നും പവാർ പറഞ്ഞു.

തന്‍റെ ജന്മദിനദിവസത്തിൽ നടത്തിയ മോദി വിരുദ്ധ റാലിയിൽ സംസാരിക്കുകയായിരുന്നു പവാർ. രാജ്യത്തെ പ്രശ്‌നങ്ങൾ പരിഹരിക്കുന്നതിൽ മോദി സർക്കാർ പരാജയപ്പെട്ടതിനാലാണ് ഗുജറാത്ത് തെരഞ്ഞെടുപ്പിൽ വിഭാഗീയത സൃഷ്ടിക്കാൻ പാകിസ്ഥാൻ വിഷയം മോദി എടുത്തിടുന്നതെന്നും പവാർ ആരോപിച്ചു. മോദിയെ ഓർത്തു ലജ്ജിക്കുന്നുവെന്നും പവാർ തന്‍റെ പ്രസംഗത്തിനിടെ പരാമർശിച്ചു.