പാത്രം കൊട്ടലും മണിയടിയുമല്ല ഹിന്ദുത്വം; ധൈര്യമുണ്ടെങ്കിൽ സർക്കാരിനെ മറിച്ചിടൂ; വെല്ലുവിളിച്ച് ഉദ്ധവ്

മുംബൈ: ബിജെപിക്കെതിരെ വെല്ലുവിളിയുമായി മഹാരാഷ്ട്ര മുഖ്യമന്ത്രി ഉദ്ധവ് താക്കറെ. അധികാരമേറ്റതു മുതൽ സർക്കാരിനെ മറിച്ചിടാൻ ശ്രമം നടക്കുകയാണ്. ധൈര്യമുണ്ടെങ്കിൽ സർക്കാരിനെ മറിച്ചിടാൻ ഉദ്ധവ് വെല്ലുവിളിച്ചു. ഇന്ത്യ ഒരു പാർട്ടിയുടേയും സ്വകാര്യ സ്വത്തല്ലെന്നും തങ്ങളെ ആക്രമിക്കാൻ വരുന്നവർ കരുത്തറിയുമെന്നും അദ്ദേഹം പറഞ്ഞു.

മണിമുഴക്കുന്നതും പാത്രം കൊട്ടുന്നതുമല്ല തന്റെ ഹിന്ദുത്വം. ശിവസേനയ്ക്ക് ആരുടേയും സർട്ടിഫിക്കറ്റ് ആവശ്യമില്ല. പ്രധാനമന്ത്രി നരേന്ദ്ര മോദിയേയും ഗവർണർ ഭഗത് സിങ് കോഷ്യാരിയേയും ഉദ്ദേശിച്ചുകൊണ്ടായിരുന്നു ഉദ്ധവിന്റെ പ്രസ്താവന. വിജയ് ദശമി സന്ദേശത്തിലാണ് ഉദ്ദവ് വിമർശനം ഉന്നയിച്ചത്.

Also Read: പൗരത്വ നിയമം : മുസ്ലീം വിഭാഗത്തെ തെറ്റിധരിപ്പിച്ചുവെന്ന് മോഹന്‍ ഭഗവത്, തങ്ങൾ കുട്ടികളല്ലെന്ന് ഒവൈസി

ഹിന്ദുത്വം എന്നാൽ പൂജ മാത്രമല്ലെന്നാണ് മോഹൻ ഭഗവത് പറഞ്ഞത്. കറുത്ത തൊപ്പിവെച്ച് നമ്മുടെ വിശ്വാസങ്ങളെ ചോദ്യം ചെയ്യുകയും മതനിരപേക്ഷ വാദിയെന്ന് വിളിക്കുകയും ചെയ്യുന്നവർ ഭഗവതിന്റെ പ്രസംഗം കേൾക്കണം. അദ്ദേഹത്തെ വിശ്വസിക്കുകയും പിന്തുടരുകയും ചെയ്യുന്നവർ തൊപ്പി ധരിക്കുക. തലച്ചോറുണ്ടെങ്കിൽ അദ്ദേഹത്തെ പിന്തുടരൂ. ഉദ്ധവ് പറഞ്ഞു.

മഹാരാഷ്ട്രയിലെ ആരാധനാലയങ്ങൾ തുറക്കാൻ വൈകുന്നതിൽ ഗവർണർ ഉദ്ധവിന് കത്തെഴുതിയിരുന്നു. ശിവസേനാ അധ്യക്ഷനായ ഉദ്ധവ് ഹിന്ദുത്വവാദം വിട്ട് മതനിരപേക്ഷ വാദിയായോ എന്നായിരുന്നു കത്തിന്റെ ചോദിച്ചിരുന്നത്. ഇതിനാണ് ഉദ്ധവിന്റെ മറുപടി.