മുഖ്യമന്ത്രിക്ക് നൽകിയത് തണുത്ത ചായ; ജീവനക്കാരന് കാരണം കാണിക്കൽ നോട്ടീസ്

ഭോപ്പാൽ: സംസ്ഥാനങ്ങളിലെ മുഖ്യമന്ത്രിമാരുടെ ഭക്ഷണ രീതികൾ അത്രയും ശ്രദ്ധാപൂർവ്വമായിരിക്കാം ഉദ്യോഗസ്ഥർ കൈകാര്യം ചെയ്യുക. മുഖ്യമന്ത്രിക്ക് നൽകിയ ഭക്ഷണത്തിന്റെ പേരിലാണ് ഇപ്പോൾ മധ്യപ്രദേശിലെ ഒരു സർക്കാർ ജീവനക്കാരൻ പുലിവാലുപിടിച്ചിരിക്കുന്നത്. മധ്യപ്രദേശ് മുഖ്യമന്ത്രി ശിവരാജ് സിങ് ചൗഹാന് നൽകിയ ചായ തണുത്തുപോയി എന്നതാണ് പ്രശ്നങ്ങൾക്ക് തുടക്കം. തണുത്ത ചായ നൽകിയ ഉദ്യോഗസ്ഥന് കാരണം കാണിക്കൽ നോട്ടീസ് കൊടുത്തു എന്നാണ് പുറത്ത് വരുന്ന റിപ്പോർട്ടുകൾ.

Also Read: 'ധീരജിനെ അപമാനിച്ചു'; ഇടുക്കി ഡിസിസി പ്രസിഡന്‍റിനെതിരെ അച്ഛൻ മാനനഷ്ടക്കേസ് നൽകി

ജൂനിയര്‍ സപ്ലൈ ഓഫീസര്‍ രാകേഷ് കനൗഹയ്ക്കാണ് കാരണം കാണിക്കൽ നോട്ടീസ് നൽകിയിരിക്കുന്നത്. നഗരസഭാ തെരഞ്ഞെടുപ്പിന്റെ പ്രചാരണത്തിന് പോകാനായിഖജുരാഹോ വിമാനത്താവളത്തിലെത്തിയതായിരുന്നു മുഖ്യമന്ത്രി. ഇതിനിടെയാണ് ജീവനക്കാരന്‍ മുഖ്യമന്ത്രിയ്ക്ക് തണുത്ത ചായ നല്‍കിയത്. വിഐപി ഡ്യൂട്ടിയിലെ പ്രോട്ടോക്കോള്‍ ലംഘിച്ചെന്നാണ് ആരോപണം. കാരണം കാണിക്കൽ നോട്ടീസ് നൽകിയതോടെ പ്രതിഷേധവുമായി പ്രതിപക്ഷം രംഗത്ത് എത്തി.

Also Read: അസുഖ ബാധിതനെ കാണാനെത്തി ശുചിമുറിയിൽ ഒളിച്ചിരുന്നു; വയോധികയെ പീഡിപ്പിക്കാൻ ശ്രമിച്ച ചുമട്ടുതൊഴിലാളി അറസ്റ്റിൽ

മുഖ്യമന്ത്രി ശിവരാജ് സിങ് ചൗഹാന് ചായയും പ്രഭാത ഭക്ഷണവും നല്‍കേണ്ടത് രാകേഷിന്റെ ചുമതലയായിരുന്നുവെന്നും അതില്‍ വരുത്തിയ അശ്രദ്ധ വിഐപി ഡ്യൂട്ടി പാലിക്കുന്നത് സംബന്ധിച്ച് പ്രോട്ടോക്കോളുകളുടെ ലംഘനമായിരുന്നുവെന്നുമാണ് രാകേഷിന് അയച്ച നോട്ടീസില്‍ പറഞ്ഞിരിക്കുന്നത്. എന്നാൽ സോഷ്യൽ മീഡിയയിൽ അടക്കമുള്ള പ്രതിഷേധം കാരണം നോട്ടീസ് പിൻവലിച്ചതായി ഛത്തർപൂർ ഡിസി സന്ദീപ് ജിആർ പറഞ്ഞു.

മുഖ്യമന്ത്രി വിമാനത്താവളത്തിൽ ചിലവഴിച്ചിട്ടില്ലെന്നും അതുകൊണ്ട് തന്നെ കനൗഹ ഒരുക്കിയ പ്രഭാത ഭക്ഷണം മുഖ്യമന്ത്രിക്ക് നൽകിയില്ലെന്നും സന്ദീപ് ജിആർ പറഞ്ഞു. നോട്ടീസ് സോഷ്യല്‍ മീഡിയയില്‍ വൈറലയാതോടെ, നടപടിയ്‌ക്കെതിരെ രൂക്ഷമായ വിമര്‍ശനങ്ങളും ഉയര്‍ന്നിരുന്നു. പ്രതിപക്ഷമായ കോണ്‍ഗ്രസ് ശക്തമായ വിമര്‍ശനവുമായി രംഗത്ത് എത്തി. സാധാരണക്കാരന് റേഷന്‍ കിട്ടിയില്ലെങ്കിലും ആംബുലന്‍സ് കിട്ടിയില്ലെങ്കിലും കുഴപ്പമില്ല, എന്നാൽ മുഖ്യമന്ത്രിക്ക് തണുത്ത ചായ കിട്ടിയതാണ് ഇവിടുത്തെ പ്രശ്നമെന്ന് കോണ്‍ഗ്രസ് വക്താവ് നരേന്ദ്ര സലൂജെ പരിഹസിച്ചു.