അജയ്യരെന്ന് തോന്നിയാലും ഏകാധിപതികൾ തകരുമെന്ന് ശ്വേത ഭട്ട്

അഹമ്മദാബാദ്: നിരന്തരമായി പ്രധാനമന്ത്രിയെ വിമർശിച്ചതിന് അറസ്റ്റിലായ സഞ്‍ജീവ് ഭട്ടിന്‍റെ ഭാര്യ ബിജെപി സർക്കാരിനെതിരെ രംഗത്ത്. ഫേസ്ബുക്കിലൂടെയാണ് ശ്വേത ഭട്ട് സർക്കാരിനെ വിമർശിച്ച് രംഗത്ത് വന്നത്. ജുഡീഷ്യറിയെയും പോലീസിനെയും കൂട്ടുപിടിച്ച് ബിജെപി സർക്കാർ സഞ്‌ജീവ്‌ ഭട്ടിനോട് പക പോക്കുകയാണെന്ന് ശ്വേത കുറിച്ചു.

ഏകാധിപതികൾ ഒരു സമയത്ത് അജയ്യരാണെന്ന് തോന്നും. ഏകാധിപതികളും കൊലയാളികളും എല്ലാക്കാലത്തും ഉണ്ടായിട്ടുണ്ട്,എന്നാൽ അവർ തകരുക തന്നെ ചെയ്യുമെന്ന് ശ്വേത ഫേസ്‌ബുക്കിൽ എഴുതി.ഫാഷിസ്റ്റ് ശക്തികൾക്കെതിരെയുള്ള പോരാട്ടമാണ് ഇപ്പോൾ നടക്കുന്നത്. നിങ്ങൾ നൽകിയ പിന്തുണക്ക് നന്ദി. ഇനിയും നിങ്ങളുടെ പ്രാർത്ഥനയും പിന്തുണയും വേണമെന്നും ശ്വേത പോസ്റ്റിൽ പറയുന്നു. സഞ്‌ജീവ്‌ ഇപ്പോഴുണ്ടായിരുന്നെങ്കിൽ മഹാത്മാഗാന്ധിയുടെ വാക്കുകൾ ഉദ്ധരിക്കുമായിരുന്നു. നിരാശ തോന്നുമ്പോൾ ആ ചരിത്രത്തിലൂടെ ഏത് രീതിയിലാണ് സത്യവും സ്നേഹവും വിജയം നേടിയതെന്ന് ചിന്തിക്കുമെന്ന് സഞ്‌ജീവ്‌ ഇപ്പോൾ പ്രസ്താവിച്ചേനെ എന്ന് ശ്വേത ഓർത്തു.


വർഷങ്ങൾക്ക് മുൻപുള്ള ഒരു കേസിലാണ് സഞ്‌ജീവ്‌ അറസ്റ്റിലായത്. ഔദ്യോഗിക സ്ഥാനം ദുരുപയോഗം ചെയ്ത് അഭിഭാഷകനെ കള്ളക്കേസിൽ കുടുക്കിയെന്ന് കാണിച്ചാണ് സഞ്‌ജീവ്‌ ഭട്ടിനെ ഇപ്പോൾ അറസ്റ്റ് ചെയ്തത്. 1998 ൽ രാജസ്ഥാൻ സ്വദേശിയായ അഭിഭാഷകനെ സഞ്‌ജീവ്‌ ഭട്ട് മയക്കുമരുന്ന് കേസിൽ കുടുക്കിയെന്നാണ് കേസ്.