തമിഴ്‌നാടിന് വെള്ളം വിട്ടുകൊടുക്കില്ലെന്ന് സിദ്ധരാമയ്യ 

ബംഗളൂരു: കാവേരി നദിയില്‍ നിന്ന് തമിഴ്‌നാടിന് ഇപ്പോള്‍ വെള്ളം വിട്ടുനല്‍കാനാകില്ലെന്ന് കര്‍ണാടക മുഖ്യമന്ത്രി സിദ്ധരാമയ്യ. തമിഴ്‌നാടിന് ഇന്ന് തന്നെ വെള്ളം വിട്ടുനല്‍കണമെന്ന സുപ്രീം കോടതി ഉത്തരവ് വന്നതിന് തൊട്ടു പിന്നാലെയാണ് കര്‍ണാടക മുഖ്യമന്ത്രിയുടെ പ്രതികരണം. കര്‍ണാടകയുടെ നടപടി ഫെഡറല്‍ സംവിധാനത്തിന് എതിരാണെന്നത് ഉള്‍പ്പെടെയുള്ള സുപ്രീംകോടതിയുടെ രൂക്ഷ വിമര്‍ശങ്ങള്‍ നിലനില്‍ക്കെയാണ് കര്‍ണാടക മുഖ്യമന്ത്രി ഇക്കാര്യം വ്യക്തമാക്കിയിരിക്കുന്നത്.

കോടതി നിര്‍ദ്ദേശം അനുസരിക്കുന്നതാണ് നല്ലതെന്ന താക്കീതും കോടതി നല്‍കിയിരുന്നു. നേരത്തേ ജലം വിട്ടുനല്‍കണമെന്ന സുപ്രീം കോടതി ഉത്തരവ് വന്നപ്പോള്‍ കര്‍ണാടക നിയമസഭ പ്രത്യേക സമ്മേളനം ചേര്‍ന്ന് വെള്ളം വിട്ടുനല്‍കേണ്ടെന്ന് പ്രമേയം പാസാക്കിയിരുന്നു. വെളളിയാഴ്ച വരെ 6000 ക്യൂസെക്‌സ് വെള്ളം നല്‍കാനാണ് സുപ്രീം കോടതി ഇന്ന് ഉത്തരവിട്ടത്. എന്നാല്‍ നിയസഭ പ്രമേയം നിലനില്‍ക്കേ കര്‍ണാടക മന്ത്രിസഭയ്ക്ക് വെള്ളം വിട്ടുനല്‍കാന്‍ തീരുമാനമെടുക്കാനാകില്ല.


അത് സംസ്ഥാന നിയമനിര്‍മാണ സഭയോടുള്ള അനാദരവാകും. അതേസമയം കോടതി നിര്‍ദേശം പാലിച്ചില്ലെങ്കില്‍ കോടതിയലക്ഷ്യ നടപടികളിലേക്ക് കാര്യങ്ങള്‍ നീങ്ങും. ഈ വര്‍ഷം അവസാനത്തോടെ മാത്രമേ തമിഴ്‌നാടിന് വെള്ളം വിട്ടുനില്‍കാനാകൂ എന്ന നിലപാടിലാണ് കര്‍ണാടകം. കര്‍ണാടകയുടെ കുടിവെള്ള ആവശ്യത്തിന് മാത്രമേ വെള്ളം തികയൂ എന്ന നിലപാടില്‍ ആണ് സംസ്ഥാനം.

English Summary: Chief Minister Siddaramaiah has defended his government’s decision not to release water to Tamil Nadu