ഭുവനേശ്വര്: ഒഡീഷയില് നവജാത ശിശുക്കളെ ബാധിക്കുന്ന അജ്ഞാത രോഗം പടര്ന്നു പിടിക്കുന്നു. ആദിവാസി മേഖലയായ മല്ക്കന്ഗിരി ജില്ലയില് കഴിഞ്ഞ മൂന്നാഴ്ചയ്ക്കിടെ സമാന രോഗലക്ഷണങ്ങളുമായി ചികിത്സയിലായിരുന്ന ആറ് കുട്ടികളാണ് മരിച്ചത്. മരിച്ചവരെല്ലാം 2 മാസത്തിനും 5 മാസത്തിനും ഇടയില് പ്രായമുള്ള കുഞ്ഞുങ്ങളാണെന്ന് ആരോഗ്യ വകുപ്പ് അധികൃതര് പറഞ്ഞു.
Also Read: പോലീസ് കോണ്സ്റ്റബിള് തസ്തികയിലേക്കുള്ള കായിക ക്ഷമതാ പരീക്ഷയ്ക്കിടെ ഉദ്യോഗാര്ത്ഥി കുഴഞ്ഞു വീണു മരിച്ചു
മല്ക്കന്ഗിരി ജില്ലയില് തമാന്പള്ളി, കാളിമേല തുടങ്ങിയ ഗ്രാമങ്ങളിലെ കുഞ്ഞുങ്ങള്ക്കാണ് രോഗലക്ഷണങ്ങള് കൂടുതലായി കാണുന്നത്. അതേ സമയം രോഗമെന്താണെന്ന് വ്യക്തമായിട്ടില്ലെന്നും പോഷകാഹാരക്കുറവാണെന്ന് സംശയിക്കുന്നതായും മല്ക്കന്ഗിരി ജില്ലാ മെഡിക്കല് ഓഫീസര് ഡോ. അജയ് ബൈതരു മാധ്യമങ്ങളോട് പറഞ്ഞു. മരണപ്പെട്ട കുട്ടികളെല്ലാം ജന്മനാ തൂക്കക്കുറവുണ്ടായിരുന്നവരാണ്. ഇവര്ക്ക് പോഷകാഹാരക്കുറവും ഉള്ളതായി കണ്ടെത്തിയിട്ടുണ്ട്.
തൂക്കക്കുറവുള്ള കുഞ്ഞുങ്ങള്ക്ക് വീട്ടുകാര് ആവശ്യമായ പരിഗണന നല്കിയിരുന്നില്ലെന്നും ചില കുട്ടികളെ വീടിനു പുറത്തെ വരാന്തയിലാണ് കിടത്തിയിരുന്നതെന്നും ഡിഎംഒ പറഞ്ഞു. ഒരേ ലക്ഷണങ്ങളോടെ ആറ് മരണങ്ങള് റിപ്പോര്ട്ട് ചെയ്തിരിക്കുന്ന സാഹചര്യത്തില് ഇതേപ്പറ്റി വിശദമായ പഠനങ്ങളും നിരീക്ഷണങ്ങളും ആരംഭിച്ചിട്ടുണ്ടെന്നും കുട്ടികളുടെ രക്തസാമ്പിളുകള് പരിശോധനയ്ക്ക് അയച്ചിട്ടുണ്ടെന്നും ജില്ലാ മെഡിക്കല് ഓഫീസര് വ്യക്തമാക്കി. മൂന്നാഴ്ചയ്ക്കിടെ അജ്ഞാത രോഗം ബാധിച്ച ആറ് കുഞ്ഞുങ്ങളും കാളിമേല സര്ക്കാര് ആശുപത്രിയില് ചികിത്സയിലിരിക്കെയാണ് മരിച്ചത്.
Also Read: ഭക്ഷണം വാഗ്ദാനം ചെയ്ത് 7 വയസ്സുകാരിയെ പീഡിപ്പിച്ചു; ഹോട്ടലുടമ അറസ്റ്റില്
രോഗം പടരുന്ന സാഹചര്യത്തില് ആരോഗ്യവകുപ്പിന്റെ നേതൃത്വത്തില് പ്രദേശത്ത് മൊബൈല് മെഡിക്കല് യൂണിറ്റുകള് പ്രവര്ത്തനം ആരംഭിച്ചിട്ടുണ്ട്. പോഷകാഹാരക്കുറവുള്ള കുട്ടികളെ കണ്ടെത്തി ഇവര്ക്ക് ചികിത്സ ലഭ്യമാക്കുകയാണ് ഡോക്ടര്മാരും ആശ വര്ക്കര്മാരുമടങ്ങുന്ന സംഘത്തിന്റെ ദൗത്യം. അതേ സമയം പോഷകാഹാരക്കുറവുള്ള പല കുഞ്ഞുങ്ങളെയും ആശുപത്രിയിലേക്ക് എത്തിക്കാന് രക്ഷിതാക്കള് തയ്യാറാകുന്നില്ലെന്ന് ആരോഗ്യവകുപ്പിലെ ഉദ്യോഗസ്ഥര് പറയുന്നു. രണ്ട് മാസങ്ങള്ക്ക് മുമ്പ് ബിഹാറില് കുട്ടികള്ക്കിടയില് മസ്തിഷ്ക ജ്വരത്തിന് സമാനമായ രോഗം പടര്ന്നു പിടിച്ചിരുന്നു. ഇരുനൂറിലേറെ കുട്ടികളാണ് ബിഹാറില് ഈ രോഗം ബാധിച്ച് മരണപ്പെട്ടത്.