ഭീഷണി കേരളത്തിനും? കണക്കുകളിൽ ഞെട്ടിച്ച് ഈ ആറ് സംസ്ഥാനങ്ങൾ, ആശങ്കപ്പെടുത്തി ഡൽഹിയിലെ കൊവിഡ് മരണങ്ങൾ

ന്യൂഡൽഹി: കൊവിഡ്-19 കേസുകളിൽ കുറവ് സംഭവിച്ചെങ്കിലും ആശങ്കപ്പെടുത്തുന്ന വിവരങ്ങളാണ് ലഭ്യമാകുന്നത്. രാജ്യത്ത് ഏറ്റവും പുതിയതായി റിപ്പോർട്ട് ചെയ്‌ത കൊവിഡ് കേസുകളിൽ 60 ശതമാനവും കേരളം ഉൾപ്പെടെയുള്ള ആറ് സംസ്ഥാനങ്ങൾ കേന്ദ്രീകരിച്ചുള്ളതാണെന്ന് റിപ്പോർട്ട്.

Also Read: കേരളത്തിൽ ഇന്ന് 5378 പേർക്ക് കൊവിഡ്-19 സ്ഥിരീകരിച്ചു; 5970 രോഗമുക്തി

ഇന്നത്തെ കൊവിഡ് കണക്കുകൾ പുറത്തുവരുന്നതിന് മുൻപുള്ള വിവരങ്ങളാണിത്. കേരളം, മഹാരാഷ്‌ട്ര, ഡൽഹി സംസ്ഥാനങ്ങളാണ് ആശങ്കയുണ്ടാക്കുന്നത്. കഴിഞ്ഞ 24 മണിക്കൂറിനിടെ 44,489 കേസുകൾ റിപ്പോർട്ട് ചെയ്‌തപ്പോൾ 60.72 ശതമാനം കേസുകൾ കേരളം ഉൾപ്പെടെയുള്ള സംസ്ഥാനങ്ങളിലാണ്.

ഒരു ദിവസം ഏറ്റവുമധികം കൊവിഡ് കേസുകൾ റിപ്പോർട്ട് ചെയ്‌തത് കേരളത്തിലാണ്. 6500 കേസുകൾ കേരളത്തിൽ റിപ്പോർട്ട് ചെയ്‌തപ്പോൾ രാജ്യത്ത് ഏറ്റവുമധികം കൊവിഡ് കേസുകൾ റിപ്പോർട്ട് ചെയ്‌ത മഹാരാഷ്‌ട്രയിൽ 5246 കേസുകളുണ്ട്.

കേസസ് പെര്‍ മില്ല്യണ്‍ കണക്കില്‍ ഡല്‍ഹിയാണ് മുന്‍പന്തിയില്‍. 10 ലക്ഷത്തില്‍ 29,169 പേരാണ് ഡല്‍ഹിയില്‍ കൊവിഡ് ബാധിതരായത്. കേരളത്തില്‍ 16,201ഉം മഹാരാഷ്ട്രയിലത് 14,584ഉം ആണ്. അതേസമയം 10 ലക്ഷത്തില്‍ രോഗം ബാധിക്കുന്നവരുടെ എണ്ണത്തിലെ ദേശീയ ശരാശരി 6715 മാത്രമാണ്.

Also Read: 'കർണ്ണാടകയിൽ ഗോവധ നിരോധനം'; കേരളത്തേയും ബാധിക്കും; അറിയേണ്ട കാര്യങ്ങൾ

രാജ്യത്തെ ഒറ്റ ദിവസത്തെ കൊവിഡ് മരണങ്ങളിൽ(524) 60.5 ശതമാനം ഡൽഹി, മഹാരാഷ്‌ട്ര, പശ്ചിമ ബംഗാൾ, ഹരിയാന, പഞ്ചാബ്, ഉത്തർപ്രദേശ് സംസ്ഥാനങ്ങളിലാണ്. ഇതിൽ മഹാരാഷ്‌ട്രയും പശ്ചിമ ബംഗാളും ഉൾപ്പെടുന്നുണ്ട്. ഡൽഹിയിലും മരണനിരക്ക് ഉയർന്ന തോതിലാണ്. പഞ്ചാബ്, ഡല്‍ഹി, പശ്ചിമബംഗാള്‍ മഹാരാഷ്ട്ര എന്നീ സംസ്ഥാനങ്ങളില്‍ മരണനിരക്ക് ദേശീയ ശരാശരിയേക്കാള്‍ കൂടുതലാണ്.