കശാപ്പ് നിരോധന ഉത്തരവ് കേന്ദ്രം പിൻവലിച്ചേക്കും

ന്യൂഡൽഹി: രാജ്യത്തെ വിവാദ വിജ്ഞാപനങ്ങളിൽ ഒന്നായ കശാപ്പ് നിരോധനം പിൻവലിക്കാൻ കേന്ദ്രസർക്കാർ ഒരുങ്ങുന്നതായി സൂചന. കേന്ദ്ര പരിസ്ഥിതി മന്ത്രാലയത്തെ ഉദ്ധരിച്ചാണ് മാധ്യമങ്ങൾ വാർത്ത റിപ്പോർട്ട് ചെയ്തിരിക്കുന്നത്. കശാപ്പിനായി കന്നുകാലികളെ വിൽക്കുന്നത് നിരോധിച്ചുകൊണ്ടുള്ള ഉത്തരവ് വിവാദമാകുകയും നിരവധി ആക്രമണങ്ങൾക്ക് കാരണമാകുകയും ചെയ്തിരുന്നു.

കേരളം ഉൾപ്പടെയുള്ള സംസ്ഥാനങ്ങൾ 2017 മെയ് 23 ന് ഇറങ്ങിയ ഉത്തരവിനെതിരെ ശക്തമായി പ്രതികരിച്ചിരുന്നു. പ്രതിപക്ഷ പാർട്ടികൾ കേന്ദ്ര സർക്കാരിനെ ആക്രമിക്കാൻ കശാപ്പ് നിരോധന ഉത്തരവ് ആയുധമായി ഉപയോഗിക്കുകയും ചെയ്തു. മൃഗങ്ങളെ ബലി കൊടുക്കുന്നതും ഉത്തരവിലൂടെ നിരോധിച്ചിരുന്നു. കറവ വറ്റിയ പശുക്കളെ കശാപ്പ് ചെയ്യാൻ സാധിക്കാത്തത് ക്ഷീര കർഷകരെ പ്രതിസന്ധിയിലാക്കിയിരുന്നു. അടുത്ത് വരുന്ന ഗുജറാത്ത് തെരഞ്ഞെടുപ്പിന് മുന്നോടിയായി ഉത്തരവ് പിൻവലിക്കുന്നതിനുള്ള തിടുക്കത്തിലാണ് കേന്ദ്രസർക്കാറെന്നും സൂചനയുണ്ട്.