മോദിയുടെ വാരാണസി സന്ദര്‍ശനത്തിനായി ചേരി ഒഴിപ്പിച്ചു; 60 കുടുംബങ്ങൾ പെരുവഴിയിലായി

വാരണാസി: പ്രധാനമന്ത്രി നരേന്ദ്ര മോദിയുടെ വാരണാസി സന്ദർശനത്തോടനുബന്ധിച്ച് ചേരി ഒഴിപ്പിച്ചതായി റിപ്പോർട്ട്. സുജാബാദിൽ അഞ്ച് പതിറ്റാണ്ടായി താമസിച്ച് വരികയായിരുന്നു 60 കുടുംബങ്ങളെ ഒഴിപ്പിച്ചെന്ന് ദ വയറാണ് റിപ്പോർട്ട് ചെയ്തത്. ഈ കുടുംബങ്ങളിലെ 250 പേരാണ് നടപടിയെത്തുടർന്ന് പെരുവഴിയിലായതെന്നാണ് റിപ്പോർട്ട്.

ഇത് രണ്ടാംതവണയാണ് മോദിയുടെ സന്ദർശനത്തോടനുബന്ധിച്ച് സുജാബാദ് ഏരിയയിലെ ചേരി ഒഴിപ്പിക്കുന്നത്. ഈ വർഷം ഫെബ്രുവരിയിൽ ദീന്‍ദയാല്‍ ഉപാധ്യായയുടെ പ്രതിമ അനാച്ഛാദനം ചെയ്യാനെത്തിയപ്പോഴായിരുന്നു ഇവരെ ആദ്യം ഒഴിപ്പിച്ചത്. ഹെലികോപ്ടര്‍ ഇറക്കാനുള്ള സൗകര്യത്തിനായിരുന്നു ഇത്. ഇത്തവണയും ഹെലികോപ്ടര്‍ ഇറക്കുന്നതിനായാണ് തങ്ങളെ ഒഴിപ്പിച്ചതെന്നാണ് പ്രദേശവാസികൾ ആരോപിക്കുന്നത്.

Also Read : ലൗ ജിഹാദിനു പിന്നാലെ ക്രിസ്ത്യൻ മിഷണറിമാരെ നോട്ടമിട്ട് ബിജെപി സർക്കാർ; പ്രതിരോധിച്ച് സഭ

ചേരിയില്‍ താമസിക്കുന്ന ഭൂരിപക്ഷം പേരും ദളിതരാണ്. "ഞാൻ ഇവിടെയാണ് ജനിച്ചത്. എന്റെ വോട്ടർ തിരിച്ചറിയൽ കാർഡ്, ആധാർ എല്ലാം ഇവിടെ രജിസ്റ്റർ ചെയ്തിട്ടുണ്ട്. എന്നിരുന്നാലും, ഓരോ വിഐപിയും എത്തുമ്പോൾ, പോലീസ് ഒരു അറിയിപ്പും നൽകാതെ ഞങ്ങളുടെ വീടുകൾ തകർക്കുകയാണ്'' ചേരി നിവാസി പറഞ്ഞതായി വയർ റിപ്പോർട്ട് ചെയ്യുന്നു.

പ്രധാനമന്ത്രിയുടെ സന്ദർശനത്തിന് മുന്നോടിയായി നഗരം വൃത്തിയാക്കാൻ 5000ത്തോളം പേരെ നിയോഗിച്ചിട്ടുണ്ട്. വിവിധ വികസന പദ്ധതികള്‍ക്ക് തുടക്കം കുറിക്കാനായാണ് മോദി സ്ഥലത്ത് എത്തുന്നത്. വാരണാസി - പ്രയാഗ് രാജ് ആറുവരിപ്പാതയുടെ നിര്‍മാണോദ്ഘാടനം അദ്ദേഹം നടത്തും. കാശി വിശ്വനാഥക്ഷേത്രം ഇടനാഴി നിര്‍മാണവും സാര്‍നാഥ് പുരാവസ്തു ഗവേഷണ പ്രവര്‍ത്തനവും അദ്ദേഹം വിലയിരുത്തുമെന്നാണ് റിപ്പോർട്ട്.