പുല്‍വാമയില്‍ ഭീകരാക്രമണം: ഒരു സൈനികന് വീരമൃത്യു

ശ്രീനഗർ: ജമ്മു കശ്മീരിലെ പുൽവാമയിൽ ഭീകരരുമായുള്ള ഏറ്റുമുട്ടലിനിടെ സൈനികന്‍ വീരമൃത്യു വരിച്ചു. പുൽവാമയിലെ കക്പോരയില്‍ സൈനിക ക്യാംപിനു നേരെയുണ്ടായ വെടിവെപ്പില്‍ പരുക്കേറ്റ സൈനികൻ മരണത്തിനു കീഴടങ്ങുകയായിരുന്നു.

സൈന്യം തിരിച്ചും വെടിവച്ചു. സംഭവത്തിൽ ബിലാ‍ൽ അഹമ്മദ് എന്ന സാധാരണക്കാരനും കൊല്ലപ്പെട്ടിട്ടുണ്ട്. ഷോപിയാനില്‍ നടന്ന മറ്റൊരു സ്ഫോടനത്തില്‍ മൂന്നു സൈനികര്‍ക്ക് പരിക്കേറ്റതായും റിപ്പോര്‍ട്ടുണ്ട്. സുഗാന്‍ ചില്ലിപ്പോര മേഖലയിലാണ് എെ ഇ ഡി ആക്രമണം ഉണ്ടായത്.

പ്രദേശത്തു സൈന്യം നിരീക്ഷണം തുടരുകയാണ്. റമസാൻ മാസത്തിൽ കശ്മീരിൽ സൈനിക ഓപ്പറേഷനുകൾ വേണ്ടെന്നു നേരത്തേ കേന്ദ്ര സര്‍ക്കാര്‍ തീരുമാനിച്ചിരുന്നു. എന്നാൽ ഭീകരർ സമാധാനം പാലിച്ചില്ലെങ്കിൽ തിരിച്ചടിക്കുമെന്നും സൈന്യം മുന്നറിയിപ്പു നൽകിയിരുന്നു.