ശീതകാലസമ്മേളനം മനപൂര്‍വ്വം വൈകിപ്പിക്കുകയാണെന്ന് സോണിയ ഗാന്ധി

ന്യൂഡൽഹി: പ്രധാനമന്ത്രി നരേന്ദ്ര മോദി അടിസ്ഥാനരഹിതമായ കാരണങ്ങള്‍ ചൂണ്ടിക്കാട്ടി പാര്‍ലമെന്‍റിന്‍റെ ശീതകാലസമ്മേളനം വൈകിപ്പിക്കുകയാണെന്ന് കോണ്‍ഗ്രസ് അധ്യക്ഷ സോണിയ ഗാന്ധിയുടെ ആരോപണം. പാര്‍ലമെന്‍റ് അടച്ചിടുന്നതിലൂടെ ഭരണഘടനാ ഉത്തരവാദിത്തത്തിൽ നിന്നു ഒഴിഞ്ഞു മാറാൻ എൻഡിഎയ്ക്ക് കഴിയില്ലെന്ന് സോണിയ പറഞ്ഞു.

കോണ്‍ഗ്രസ് അധ്യക്ഷനായുള്ള രാഹുൽ ഗാന്ധിയുടെ സ്ഥാനാരോഹണം സംബന്ധിച്ച് തീരുമാനം സ്വീകരിക്കുന്നതിനായി ചേര്‍ന്ന യോഗത്തിലാണ് സോണിയയുടെ ആരോപണം. 2014ലെ തെരഞ്ഞെടുപ്പിൽ ജനങ്ങള്‍ക്കു നല്‍കിയ വാഗ്ദാനങ്ങളൊന്നും നടപ്പാക്കാൻ മോദി സര്‍ക്കാരിനു കഴിഞ്ഞിട്ടില്ലെന്നും എന്നാൽ വ്യാജ വാഗ്ദാനങ്ങള്‍ നല്‍കുന്നത് മോദി തുടരുകയാണെന്നും സോണിയ കുറ്റപ്പെടുത്തി.

എന്നാൽ സോണിയയുടെ ആരോപണം കേന്ദ്ര ധനമന്ത്രി അരുണ്‍ ജെയ്റ്റ്ലി തള്ളി. സമ്മേളനം വൈകിപ്പിച്ചതല്ലെന്നും പല സംസ്ഥാനങ്ങളിലും തിരഞ്ഞെടുപ്പ് നടക്കുന്ന സാഹചര്യത്തിൽ അതിനെ ബാധിക്കാത്ത തരത്തിൽ സമ്മേളനം പുനക്രമീകരിച്ചതാണെന്നും ജെയ്റ്റ്ലി പറഞ്ഞു.2011ലും സമാനമായ സാഹചര്യത്തിൽ സമ്മേളനം വൈകിപ്പിച്ചിട്ടുണ്ടെന്നും ജെയ്റ്റ്ലി കൂട്ടിച്ചേര്‍ത്തു.