കാർഷിക നിയമത്തെ എതിരിടാൻ കോൺഗ്രസ് ഭരിക്കുന്ന സംസ്ഥാനങ്ങളിൽ നിയമ നിർമ്മാണം വേണം: സോണിയ

ന്യൂഡൽഹി: കേന്ദ്രസർക്കാരിന്റെ കർഷക നിയമത്തെ മറികടക്കാൻ കോൺഗ്രസ് ഭരിക്കുന്ന സംസ്ഥാനങ്ങളിൽ നിയമ നിർമ്മാണം നടത്തുന്നത് പരിഗണിക്കണമെന്ന് സോണിയ ഗാന്ധി ആവശ്യപ്പെട്ടു.

കേന്ദ്രത്തിന്റെ കർഷക വിരുദ്ധ നയങ്ങൾ തള്ളിക്കളയുന്നതിന് ഭരണഘടനയുടെ അനുച്ഛേദം 254 (2) പ്രകാരം സംസ്ഥാനങ്ങൾ നിയമ നിർമ്മാണം നടത്തണമെന്ന് സോണിയ ഗാന്ധി കോൺഗ്രസ് ഭരിക്കുന്ന സംസ്ഥാനങ്ങളോട് ആവശ്യപ്പെട്ടുവെന്ന് കെസി വേണുഗോപാലാണ് വാർത്താ സമ്മേളനത്തിലാണ് വ്യക്തമാക്കിയത്.

Also Read: 'ബിജെപി ചെയ്യുന്നതാണ് രാജ്യവിരുദ്ധ പ്രവർത്തനം': കേന്ദ്രം രാജ്യത്തെ സംവിധാനം അട്ടിമറിച്ചെന്ന് പഞ്ചാബ് മുഖ്യമന്ത്രി

താങ്ങുവില ഒഴിവാക്കുന്നത് അടക്കമുള്ള മോദി സർക്കാരിന്റെ കർഷക വിരുദ്ധ നയങ്ങളിൽ നിന്നും കർഷകരെ മോചിപ്പിക്കണമെന്നാണ് കോൺഗ്രസിന്റെ ആവശ്യം. കോൺഗ്രസ് ഭരിക്കുമ്പോൾ നടപ്പാക്കിയ ഭൂമി ഏറ്റെടുക്കൽ നിയമം മറികടക്കാൻ അനുച്ഛേദം 254 (2) പ്രകാരം നിയമനിർമ്മാണം നടത്തണമെന്ന് 2015 ൽ അന്നത്തെ ധനമന്ത്രി അരുൺ ജെയ്റ്റ്ലി സംസ്ഥാനങ്ങളോട് നിർദ്ദേശിച്ചിരുന്നു.

അതേസമയം, കാര്‍ഷിക നിയമങ്ങള്‍ പാസാക്കിയ കേന്ദ്ര നടപടി ദേശവിരുദ്ധ പ്രവര്‍ത്തനമാണെന്ന് പഞ്ചാബ് മുഖ്യമന്ത്രി അമരീന്ദർ സിങ് പറഞ്ഞു. സ്വാതന്ത്ര്യസമരസേനാനി ഭഗത് സിങിൻ്റെ സ്മാരകത്തിൽ സത്യാഗ്രഹം നടത്തവെയാണ് കേന്ദ്രത്തിനെതിരെ അമരീന്ദർ സിങ് ആഞ്ഞടിച്ചത്.