ഹരിയാനയിൽ അപ്രതീക്ഷിത നീക്കം; കോൺഗ്രസിനെ ഞെട്ടിച്ച് ജെജെപി: ബിജെപിയെ പിന്തുണക്കുമെന്ന് റിപ്പോർട്ട്

ചണ്ഡീഗഡ്: ഹരിയാനയിൽ സർക്കാരുണ്ടാക്കാൻ ജനനായക് ജനത പാർട്ടി ബിജെപിക്ക് പിന്തുണ നൽകുമെന്ന് റിപ്പോർട്ട്. 40 സീറ്റുകൾ നേടിയ ബിജെപിക്ക് കേവഭൂരിപക്ഷമില്ലാതെ പോയതോടെയാണ് ജെജെപിയുടെ പിന്തുണ തേടിയത്. നേരത്തെ ജെജെപിയെ ഒപ്പം നിർത്തി സർക്കാർ രൂപീകരിക്കാൻ കോൺഗ്രസ് ശ്രമം നടത്തിയിരുന്നു. കർണാടകയിൽ ജെഡിഎസിനെ ഒപ്പം നിർത്തിയത് പോലെ മുഖ്യമന്ത്രിസ്ഥാനം ജെജെപിക്ക് വാഗ്ദാനം ചെയ്തു കൊണ്ട് മുന്നോട്ട് പോകാനായിരുന്നു കോൺഗ്രസ് നീക്കം.

സർക്കാർ രൂപീകരണ അവകാശം ഉന്നയിച്ച് മനോഹർലാൽ ഖട്ടർ വൈകാതെ ഹരിയാന ഗവർണറെ കാണും. 31 സീറ്റുകളാണ് മുൻ മുഖ്യമന്ത്രി ഭൂപീന്ദർ സിംഗ് ഹൂഡയുടെ നേതൃത്വത്തിലുള്ള കോൺഗ്രസ് ഹരിയാനയിൽ നേടിയത്. 47 സീറ്റുകളായിരുന്നു ഹരിയാനയിൽ കേവലഭൂരിപക്ഷം നേടാനായി വേണ്ടിയിരുന്നത്. നേരത്തെ ഐഎൻഎൽഡിയിൽ നിന്ന് പുറത്താക്കപ്പെട്ട ശേഷം 2018 ഡിസംബറിലാണ് ദുഷ്യന്ത് ചൗട്ടാലയുടെയും പിതാവ് അജയ് ചൗട്ടാലയുടെയും നേതൃത്വത്തിൽ ജെജെപി രൂപീകരിച്ചത്.

Also Read: Haryana Congress: ഹരിയാനയില്‍ ഈ 31കാരൻ കിങ് മേക്കറാകുമോ?; കർണാടക മോഡൽ പരീക്ഷണം നടത്താനൊരുങ്ങി കോൺഗ്രസ്

ഹരിയാന മുൻ മുഖ്യമന്ത്രി ഓംപ്രകാശ് ചൗട്ടാലയുടെ ചെറുമകനും വി.പി സിങ് മന്ത്രിസഭയിൽ ഉപപ്രധാനമന്ത്രിയായിരുന്ന ചൗധരി ദേവി ലാലിന്റെ പേരക്കുട്ടിയുടെ മകനുമാണ് ഹിസാർ ലോക്‌സഭാ മണ്ഡലത്തിൽ നിന്നുള്ള എംപി കൂടിയായ ദുഷ്യന്ത് ചൗട്ടാല.ചൗധരി ദേവി ലാലിന്റെ ആദർശങ്ങളെ അടിസ്ഥാനമാക്കിയാണ് പാർട്ടി രൂപീകരിച്ചത്. 'ജനനായകൻ' എന്ന് ചൗധരി ദേവി ലാലിനെ ജനങ്ങൾ വിളിച്ച പേര് തന്നെ പാർട്ടിക്ക് നൽകുന്നുവെന്ന് ദുഷ്യന്ത് ചൗട്ടാല പ്രഖ്യാപിച്ചിരുന്നു.

ലോക്‌സഭയിലേക്ക് തെരഞ്ഞെടുക്കപ്പെടുന്ന ഏറ്റവും പ്രായം കുറഞ്ഞ എംപി എന്ന റെക്കോർഡും ദുഷ്യന്ത് ചൗട്ടാലയുടെ പേരിൽ തന്നെയാണ്. വോട്ടെണ്ണൽ തുടങ്ങി ഏതാനം മണിക്കൂറുകൾക്കകം തന്നെ ദേശീയതലത്തിൽ ശ്രദ്ധാകേന്ദ്രമായി മാറിയിരുന്നു ദുഷ്യന്ത് ചൗട്ടാല. ഇത്തവണത്തെ തെരഞ്ഞെടുപ്പിൽ ദേശീയ തലത്തിൽ ചർച്ച കൊഴുക്കുന്നതും 31 കാരനായ ഹരിയാനയിലെ കിംഗ്‍മേക്കര്‍ ദുഷ്യന്ത് ചൗട്ടാലയെ കുറിച്ച് തന്നെ.

Also Read: Haryana Election Results 2019: ഹരിയാനയിൽ അപ്രതീക്ഷിത നീക്കം; കിങ്മേക്കറായി ദുഷ്യന്ത് ചൗട്ടാല, ഖട്ടർ ഗവർണറെ കാണും

നേരത്തെ ജെജെപിയെ ഒപ്പം നിർത്താനായി ദുഷ്യന്തിന് മുഖ്യമന്ത്രി സ്ഥാനം നൽകാനും കോൺഗ്രസ് ഒരുക്കമായിരുന്നു. അതിൽ തീരുമാനമെടുക്കാനുള്ള പൂർണ ചുമതല ഹൂഡക്ക് കോൺഗ്രസ് അധ്യക്ഷ സോണിയ ഗാന്ധി നൽകിയിരുന്നു. ജെജെപിയെ കൂടെ നിർത്താനായി ബിജെപി മുന്നോട്ട് വെക്കുന്ന വാഗ്ദാനം എന്തായിരിക്കുമെന്ന് ഇതു വരെ വ്യക്തമല്ല.നിലവിലെ മുഖ്യമന്ത്രിയായ മുതിർന്ന നേതാവ് മനോഹർ ലാൽ ഖട്ടറിനെ പിന്തള്ളിക്കൊണ്ട് ദുഷ്യന്തിന് മുഖ്യമന്ത്രി സ്ഥാനം നൽകുമോയെന്നത് കാത്തിരുന്ന് കാണാം.