യുപിയില്‍ രണ്ടു മണ്ഡലങ്ങളിലും സമാജ് വാദി പാര്‍ട്ടി ലീ‍ഡ് ചെയ്യുന്നു

ഗോരഖ്പൂര്‍: ഉത്തര്‍ പ്രദേശില്‍ ഭരണകക്ഷിയായ ബിജെപിയെ ഞെട്ടിച്ചുകൊണ്ട് ഉപതിരഞ്ഞെടുപ്പ് നടന്ന രണ്ട് ലോക്‌സഭാ മണ്ഡലങ്ങളിലും സമാജ് വാദി പാര്‍ട്ടി സ്ഥാനാര്‍ത്ഥികള്‍ ലീഡ് ചെയ്യുന്നു. മുഖ്യമന്ത്രി യോഗി ആദിത്യനാഥ് തുടര്‍ച്ചയായി അഞ്ച് തവണ വിജയിച്ച ഗോരഖ്പൂര്‍ മണ്ഡലത്തിലെ വോട്ടെണ്ണല്‍ പുരോഗമിക്കുമ്പോള്‍ ആദ്യ രണ്ട് റൗണ്ടുകളിലും മുന്നിലായ ബിജെപിയെ മറികടന്ന് എസ്പി സ്ഥാനാര്‍ഥി മുന്നിലെത്തി.

ഖൊരഖ്പൂര്‍ മണ്ഡലത്തില്‍ സമാജ് വാദി പാര്‍ട്ടി പ്രവീണ്‍ നിഷാദ് 3000 ത്തോളം വോട്ടുകള്‍ക്ക് ബിജെപി സ്ഥാനാര്‍ത്ഥി ഉപേന്ദ്രനാഥ് ശുക്ലയേക്കാള്‍ മുന്നിലാണ്. 2014 ലോക്‌സഭാ തിരഞ്ഞെടുപ്പില്‍ യോഗി മൂന്നു ലക്ഷത്തിലേറെ വോട്ടിന് ജയിച്ച മണ്ഡലമാണ് ഗോരഖ്പൂര്‍.

ഉപമുഖ്യമന്ത്രിയായ കേശവ് പ്രസാദ് മൗര്യ എം.പി സ്ഥാനം രാജിവെച്ച ഒഴിവിലേക്ക് നടന്ന ഫൂല്‍പുറിലെ തിരഞ്ഞെടുപ്പിന്റെ വോട്ടെണ്ണലിലും ബിജെപി തിരിച്ചടി നേരിടുകയാണ്. ഫുല്‍പൂരില്‍ 1058 വോട്ടുകള്‍ക്ക് സമാജ് വാദി പാര്‍ട്ടി സ്ഥാനാര്‍ത്ഥി നാഗേന്ദര്‍ സിങ് മുന്നിലാണ്. രണ്ട് മണ്ഡലങ്ങളിലും എസ്പി സ്ഥാനാര്‍ഥികള്‍ക്ക് ബിഎസ്പി പിന്തുണ പ്രഖ്യാപിച്ചിരുന്നു.

ബിഹാറില്‍ ഉപതിരഞ്ഞെടുപ്പ് നടന്ന അരാരിയ ലോക്സഭാ സീറ്റിലും രണ്ട് നിയമസഭാ മണ്ഡലങ്ങളിലും ബിജെപി സഖ്യം പിന്നിലാണ്. അരരിയയിൽ ബിജെപിയും ആർജെഡിയും തമ്മിലാണു കടുത്ത പോരാട്ടം. ആർജെഡി എംപിയുടെ മരണത്തെത്തുടർന്നാണ് അരരിയയിൽ തിരഞ്ഞെടുപ്പു വേണ്ടിവന്നത്.