സ്‌പൈസ് ജെറ്റ് വിമാനത്തിന്റെ ടയര്‍ പൊട്ടി; വിമാനം തിരിച്ചിറക്കി

ചെന്നൈ: പറന്നുയരുന്നതിനിടെ ചെന്നൈ- ഡല്‍ഹി സ്‌പൈസ് ജെറ്റ് വിമാനത്തിന്റെ ടയര്‍ പൊട്ടിയതിനെത്തുടര്‍ന്ന് വിമാനം അടിയന്തരമായി തിരിച്ചിറക്കി. നൂറിലേറെ യാത്രക്കാര്‍ ഉണ്ടായിരുന്ന ബോയിങ് 737 വിമാനത്തിന്റെ ടയറാണ് ടേക്ക് ഒാഫിനിടെ പൊട്ടിയത്.

ടയര്‍ പൊട്ടിയ വിമാനം റണ്‍വെയ്ക്ക് സമീപം കുടുങ്ങിയതോടെ വിമാനത്താവളത്തിന്റെ പ്രവര്‍ത്തനം ഭാഗികമായി തടസപ്പെട്ടു. പ്രധാന റണ്‍വെ അടച്ചതാണ് വിമാന സര്‍വീസുകളെ ബാധിച്ചത്.

വിമാനത്തിലെ മുഴുവന്‍ യാത്രക്കാരും സുരക്ഷിതരാണെന്നും അവരെ വിമാനത്താവള ടെര്‍മിനലിലേക്ക് മാറ്റിയിട്ടുണ്ടെന്നും സ്‌പൈസ് ജെറ്റ് വക്താവ് പറഞ്ഞു.