ഡിഎംകെ കോണ്‍ഗ്രസ് സഖ്യത്തില്‍ തുടരുമെന്ന് സ്റ്റാലിന്‍

ചെന്നൈ: ബിജെപി പക്ഷത്തേക്ക് ഡിഎംകെ അടുക്കുന്നുവെന്ന അഭ്യൂഹങ്ങള്‍ക്ക് വിരാമമിട്ടുകൊണ്ട് അധ്യക്ഷന്‍ എം.കെ സ്റ്റാലിന്‍ രംഗത്ത്. കോണ്‍ഗ്രസുമായി അടുത്ത ലോക്സഭാ തിരഞ്ഞെടുപ്പിലും സഖ്യം തുടരുമെന്നാണ് സ്റ്റാലിന്‍ തന്‍റെ ട്വിറ്ററില്‍ കുറിച്ചത്. മതനിരപേക്ഷ കാത്തു സൂക്ഷിക്കാന്‍ ഡിഎംകെ കോണ്‍ഗ്രസിനൊപ്പം തുടരണമെന്ന രാഹുല്‍ ഗാന്ധിയുടെ ആശംസയക്ക് സ്റ്റാലിന്‍ ട്വീറ്റില്‍ നന്ദി അറിയിച്ചിട്ടുണ്ട്.

കരുണാനിധിക്ക് ആദരാഞ്ജലി അര്‍പ്പിച്ച് ഡിഎംകെ ഇന്ന് ചെന്നൈയില്‍ സമ്മേളനം നടത്തുന്നുണ്ട്. സമ്മേളനത്തില്‍ ബിജെപി അധ്യക്ഷന്‍ അമിത് ഷാക്കും ക്ഷണമുണ്ട്. ഇതോടെയാണ് ഡിഎംകെയുടെ നിലപാട് മാറ്റത്തെക്കുറിച്ച് അഭ്യൂഹം ശക്തമായത്. എന്നാല്‍ അധ്യക്ഷ സ്ഥാനം ഏറ്റെടുത്തു നടത്തിയ പ്രസംഗത്തില്‍ കേന്ദ്ര സര്‍ക്കാരിനെതിരെ സ്റ്റാലിന്‍ ആഞ്ഞടിച്ചിരുന്നു. മനുഷ്യാവകാശ പ്രവര്‍ത്തകരെ അറസ്റ്റ് ചെയ്യുന്ന കേന്ദ്ര സര്‍ക്കാരിന്‍റെ നടപടിയെയും സ്റ്റാലിന്‍ വിമര്‍ശിച്ചിരുന്നു. ഇതിനു പിന്നാലെയാണ് കോണ്‍ഗ്രസ് സഖ്യത്തില്‍ തുടരുമെന്നുള്ള സ്റ്റാലിന്‍റെ ട്വീറ്റും രംഗത്തുവന്നത്.