നരേന്ദ്ര മോദി സർക്കാരിനെ പാഠം പഠിപ്പിക്കുമെന്ന് സ്റ്റാലിൻ

ചെന്നൈ: നരേന്ദ്ര മോദി സര്‍ക്കാരിനെതിരെ ആഞ്ഞടിച്ച് ഡിഎംകെ പ്രസിഡന്‍റായി ചുമതലയേറ്റയുടൻ എംകെ സ്റ്റാലിൻ. മോദി സര്‍ക്കാരിനെ പാഠം പഠിപ്പിക്കുമെന്നും എല്ലാത്തിനും മതത്തിന്‍റെ നിറം നല്‍കുന്നവരെ എതിര്‍ക്കുകയാണ് തന്‍റെ സ്വപ്നമെന്നും സ്റ്റാലിൻ പറഞ്ഞു. അഴിമതിക്കാരായ തമിഴ്നാട് സര്‍ക്കാരിനെ തകര്‍ത്തെറിയുമെന്നും അദ്ദേഹം കൂട്ടിച്ചേര്‍ത്തു.

പാര്‍ട്ടിയെ നയിക്കേണ്ടി വരുമെന്ന് സ്വപ്നത്തിൽ പോലും താൻ കരുതിയില്ല. ഇത് വലിയ ഉത്തരവാദിത്തമാണെന്നും നമുക്കെല്ലാം ഒരുമിച്ച് വേണം മുന്നോട്ട് നീങ്ങാനെന്നും സ്റ്റാലിൻ പറഞ്ഞു. നമ്മുടേതടക്കം എല്ലാ തെറ്റുകളെയും ചോദ്യം ചെയ്യാൻ തയ്യാറാകണമെന്നും സ്റ്റാലിൻ പറഞ്ഞു.

നിലവിലെ രാഷ്ട്രീയസ്ഥിതി വളരെ മോശമായ അവസ്ഥയിലാണെന്നും അദ്ദേഹം അഭിപ്രായപ്പെട്ടു. വിദ്യാഭ്യാസം, കല, സാഹിത്യം, മതം തുടങ്ങിയവയെല്ലാം അധികാരികളുടെയും വര്‍ഗീയശക്തികളുടെയും നിയന്ത്രണത്തിലാണെന്നും നിയമവ്യവസ്ഥയെയും ഗവര്‍ണര്‍മാരെയും അസ്ഥിരപ്പെടുത്താനാണ് കേന്ദ്രസര്‍ക്കാര്‍ ശ്രമിക്കുന്നതെന്നും അദ്ദേഹം പറഞ്ഞു.

ബിജെപി ഭരണത്തിന് കീഴിൽ സംസ്ഥാന സര്‍ക്കാരുകളുടെ അധികാരങ്ങള്‍ പോലും ചവിട്ടിയൊതുക്കപ്പെടുകയാണെന്നും സ്റ്റാലിൻ കൂട്ടിച്ചേര്‍ത്തു.