നീതിക്ക് വേണ്ടിയാണ് നിലകൊള്ളുന്നത്: ജസ്റ്റിസ് കുര്യൻ ജോസഫ്

കൊച്ചി: നീതിക്കും നീതിപീഠത്തിനും വേണ്ടിയാണ് നിലകൊള്ളുന്നതെന്ന് ജസ്റ്റിസ് കുര്യൻ ജോസഫ്. ജസ്റ്റിസ് ചെലമേശ്വറിന്‍റെ നേതൃത്വത്തിൽ ഇന്നലെയാണ് കൊളീജിയത്തിലെ അംഗങ്ങളായ മുതിർന്ന നാലു ജഡ്‌ജിമാർ പത്രസമ്മേളനം നടത്തിയത്. പ്രതിഷേധക്കൊടിയുയർത്തിയ ജഡ്‌ജിമാരിൽ കുര്യൻ ജോസഫും ഉണ്ടായിരുന്നു. തങ്ങളുടെ ഭാഗത്ത് നിന്ന് അച്ചടക്ക ലംഘനം ഉണ്ടായിട്ടില്ല. ജനങ്ങൾക്ക് നീതിപീഠത്തിലുള്ള വിശ്വാസം നഷ്ടപ്പെടാൻ പാടില്ല. കാര്യങ്ങൾ ഇനി സുതാര്യമാകുമെന്നാണ് വിശ്വാസമെന്നും കുര്യൻ ജോസഫ് മാധ്യമങ്ങളോട് കൊച്ചിയിൽ പറഞ്ഞു.

ജസ്റ്റിസ് ജെ.ചെലമേശ്വർ, രഞ്‌ജൻ ഗോഗോയ്, മദൻ ബി.ലൊക്കൂർ, കുര്യൻ ജോസഫ് എന്നിവരാണ് സുപ്രീം കോടതി നടപടികൾ സുതാര്യമല്ലെന്നും ഇത് ജനാധിപത്യത്തെ തകർക്കുമെന്നും മുന്നറിയിപ്പ് നൽകി രംഗത്തെത്തിയത്. സ്വതന്ത്ര ഇന്ത്യയിൽ ജഡ്‌ജിമാർ മാധ്യമങ്ങളിലൂടെ ജനങ്ങളെ അഭിസംബോധന ചെയ്യുന്നത് ചരിത്ര സംഭവമാണ്. ബിജെപി ദേശീയാധ്യക്ഷൻ അമിത് ഷാ പ്രതിപട്ടികയിൽ ഉൾപ്പെട്ട സൊറാബുദ്ദീൻ വ്യാജ ഏറ്റുമുട്ടൽ അടക്കമുള്ള കേസുകൾ പരിഗണിച്ച രീതി എന്നിവയും ജഡ്‌ജിമാർ ചോദ്യം ചെയ്തിരുന്നു. ചീഫ് ജസ്റ്റിസിനെ ഇംപീച്ച് ചെയ്യണോ എന്ന് ജനങ്ങൾ തീരുമാനിക്കട്ടെയെന്ന് ജസ്റ്റിസ് ചെലമേശ്വർ പ്രതികരിച്ചിരുന്നു.