സ്‌കൂള്‍ അധികൃതര്‍ കുട്ടിയെ മര്‍ദ്ദിച്ച് കൊന്നുവെന്ന് പരാതി

ഇംഫാല്‍: ഫീസ് അടയ്ക്കാത്തതിന് സ്‌കൂള്‍ അധികൃതര്‍ ആറാം ക്ലാസ് വിദ്യാര്‍ഥിയെ മര്‍ദ്ദിച്ച് കൊലപ്പെടുത്തിയെന്ന് പരാതി. മണിപ്പുരിലെ ഇംഫാലിനടുത്ത് ലാംഗോളിലുള്ള സുരേഷ് ടോങ്‍ഗ്രാമാണ് മരിച്ചത്. ഫീസ് അടയ്ക്കാത്തതിന് കുട്ടിയെ സ്‌കൂളില്‍നിന്ന് കൂട്ടിക്കൊണ്ടുപോകണമെന്ന് അധികൃതര്‍ തന്നോട് ആവശ്യപ്പെട്ടുവെന്നും എന്നാല്‍ പിന്നീട് അവര്‍ നിലപാട് മാറ്റിയെന്നും കുട്ടിയുടെ പിതാവ് ബീര ടോങ്‍ഗ്രാം മാധ്യമങ്ങളോട് പറഞ്ഞു.

തുടര്‍ന്ന് വെള്ളിയാഴ്ച രാത്രി സ്‌കൂള്‍ അധികൃതര്‍ അവശനായ കുട്ടിയെ വീട്ടിലെത്തിച്ചു. അനുസരണക്കേട് കാണിച്ചതിന് ശിക്ഷിച്ചുവെന്നാണ് അധികൃതര്‍ ബന്ധുക്കളോട് പറഞ്ഞത്. തൊട്ടുപിന്നാലെ കുട്ടി കുഴഞ്ഞുവീണ് മരിക്കുകയായിരുന്നു. ക്രൂരപീഡനത്തെ തുടര്‍ന്നാണ് കുട്ടി മരിച്ചതെന്നും നീതി ലഭിക്കാതെ മൃതദേഹം ഏറ്റുവാങ്ങില്ലെന്നും കുട്ടിയുടെ പിതാവ് പറഞ്ഞു. സംഭവത്തില്‍ പ്രതികരിക്കാന്‍ സ്കൂള്‍ അധികൃതര്‍ ഇതുവരെ തയ്യാറായിട്ടില്ല.