കേസുകള്‍ ഇഴയുന്നു; ഖേദം പ്രകടിപ്പിച്ച് ചീഫ് ജസ്റ്റിസ്‍

ന്യൂഡൽഹി: സുപ്രീം കോടതിയിൽ കേസുകള്‍ കൈകാര്യം ചെയ്യുന്ന വിധത്തിലും കാലതാമസത്തിലും ഖേദം പ്രകടിപ്പിച്ച് ചീഫ് ജസ്റ്റിസ് രഞ്ജൻ ഗൊഗോയ്. വ്യാഴാഴ്‍ച്ച കോടതി നടപടികള്‍ നടക്കുന്നതിനിടെയാണ് ചീഫ് ജസ്റ്റിസിന്‍റെ പരാമര്‍ശം.

പൗരന്മാരുടെ ഭരണഘടനാപരമായ അവകാശങ്ങള്‍ ഉറപ്പുവരുത്തുന്നതോ അസാധാരണ തരത്തിലുള്ളതോ ആയ വിധികള്‍ സുപ്രീം കോടതിയിൽ നിന്ന് ഉണ്ടാകുന്നില്ലെന്ന് ഗൊഗോയ് കൂട്ടിച്ചേര്‍ത്തു. കൂടെ പ്രവര്‍ത്തിക്കുന്ന മറ്റു ജഡ്‍ജിമാര്‍ക്കും ഇതേ അഭിപ്രായമാണെന്നും ഗൊഗോയ് കൂട്ടിച്ചേര്‍ത്തു.

10 വര്‍ഷത്തിലേറെയായി വാദം തുടരുന്ന ഒരു കേസ് പരിഗണിക്കുമ്പോഴായിരുന്നു രഞ്ജൻ ഗൊഗോയുടെ പരാമര്‍ശം. ആര്‍ക്കു വേണമെങ്കിലും ഉത്തരവ് ലഭിക്കാവുന്ന ഇടമായി സുപ്രീം കോടതി മാറിയെന്നും എത്ര കാലം വേണമെങ്കിലും കേസ് നീട്ടിക്കൊണ്ടു പോകാൻ സാധിക്കുന്നതായും അദ്ദേഹം നിരീക്ഷിച്ചു.