Rafale Deal SC Verdict: റഫാല്‍ വിഷയത്തില്‍ അന്വേഷണം വേണ്ടെന്ന് സുപ്രീംകോടതി

ന്യൂഡല്‍ഹി: റഫാല്‍ യുദ്ധ വിമാന ഇടപാടില്‍ കേന്ദ്ര സര്‍ക്കാരിന് സുപ്രീംകോടതിയുടെ ക്ലീന്‍ചീറ്റ്. ഇടപാടില്‍ അഴിമതി ഉണ്ടെന്നും സുപ്രീംകോടതിയുടെ മേല്‍നോട്ടത്തില്‍ അന്വേഷണം വേണമെന്ന ഹര്‍ജിക്കാരുടെ ആവശ്യമാണ് ഇന്ന് സുപ്രീംകോടതി തള്ളിയത്. ചീഫ് ജസ്റ്റിസ് രജ്ഞന്‍ ഗോഗോയ് അധ്യക്ഷനായ ബെഞ്ചില്‍ ജസ്റ്റിസ് സജ്ഞയ് കിഷന്‍ കൗള്‍, ജസ്റ്റിസ് കെ എം ജോസഫ് എന്നിവരാണ് കേസ് പരിശോധിച്ചത്.



റഫാല്‍ യുദ്ധവിമാന ഇടപാടുമായി ബന്ധപ്പെട്ട് ഒരു സംശയവും ഇപ്പോള്‍ ഉയര്‍ന്നിട്ടില്ല. അതോടൊപ്പം റഫാലിന്‍റെ വിലയെ കുറിച്ച് പരിശോധിക്കേണ്ട കാര്യമില്ലെന്ന് വ്യക്തമാക്കി അന്വേഷണം ആവശ്യമില്ലെന്ന് സുപ്രീംകോടതി അറിയിക്കുകയായിരുന്നു. അതോടൊപ്പം കേന്ദ്ര സര്‍ക്കാരിന്‍റെ നടപടിക്രമങ്ങള്‍ ശരിയാണെന്നും സുപ്രീംകോടതി പറഞ്ഞു.

റഫാല്‍ ഇടപാടില്‍ റിലയന്‍സിനെ തിരഞ്ഞെടുത്തതില്‍ പിഴവുണ്ടായിട്ടുണ്ടെന്ന് കണ്ടെത്താന്‍ സാധിച്ചിട്ടില്ല. റഫാല്‍ യുദ്ധ വിമാനങ്ങള്‍ ഇന്ത്യന്‍ വ്യോമ സേനയ്ക്ക് ആവശ്യമാണ്. ചില വ്യക്തികളുടെ ആവശ്യപ്രകാരം നിര്‍ണായക ഇടപാടിനെ പരിശോധിക്കാന്‍ സാധിക്കില്ലെന്നും സുപ്രീംകോടതി വ്യക്തമാക്കി.

അഭിഭാഷകരായ പ്രശാന്ത് ഭൂഷൺ, മുൻ കേന്ദ്ര മന്ത്രിമാരായ അരുൺ ഷൂറി, യശ്വന്ത് സിൻഹ എന്നിവരാണ് സുപ്രീം കോടതിയുടെ മേൽനോട്ടത്തിൽ അന്വേഷണം നടത്തണമെന്ന് ആവശ്യപ്പെട്ട് കോടതിയെ സമീപിച്ചിത്. ഇടപാടുമായി ബന്ധപ്പെട്ട രേഖകളും സ്വീകരിച്ച നടപടികള്‍ സംബന്ധിച്ച വിശദീകരണവും ഹാജരാക്കാൻ കേന്ദ്രസര്‍ക്കാരിനോട് സുപ്രീം കോടതി ആവശ്യപ്പെട്ടിരുന്നു.

മൂന്ന് സംസ്ഥാനങ്ങളിലെ തോല്‍വിക്കുശേഷം സുപ്രീംകോടതിയുടെ വിധിയിലൂടെ കേന്ദ്ര സര്‍ക്കാരിന് ആശ്വാസമാണ് ഉണ്ടായിരിക്കുന്നത്.