ശബരിമല: റിട്ട് ഹര്‍ജികള്‍ പിന്നീട് പരിഗണിക്കാമെന്ന് സുപ്രീംകോടതി

ന്യൂഡല്‍ഹി: ശബരിമല സ്ത്രീ പ്രവേശനത്തിനെതിരായ റിട്ട് ഹര്‍ജികള്‍ പിന്നീട് പരിഗണിക്കാമെന്ന് സുപ്രീംകോടതി. പുനപരിശോധന ഹര്‍ജികള്‍ പരിഗണിച്ചതിനുശേഷം മാത്രമേ റിട്ട് ഹര്‍ജികള്‍ പരിഗണിക്കുമെന്ന് സുപ്രീംകോടതി വ്യക്തമാക്കി. അതോടൊപ്പം പുനപരിശോധനാ ഹര്‍ജികള്‍ തുറന്ന കോടതിയില്‍ പരിഗണിക്കണമെന്ന ആവശ്യവും കോടതി അനുവദിച്ചില്ല.

ഇന്ന് രാവിലെ 11.30 നോടെയായിരുന്നു സ്ത്രീ പ്രവേശന വിധിയിന്മേലുള്ള റിട്ട് ഹര്‍ജികള്‍ മൂന്നംഗ ബെഞ്ച് പരിഗണിക്കാനിരുന്നത്. എന്നാല്‍ ഇത് പുനപരിശോധന ഹര്‍ജികളുടെ ഉത്തരവിനുശേഷം പരിശോധിക്കാമെന്ന് ചീഫ് ജസ്റ്റിസ് വ്യക്തമാക്കുകയായിരുന്നു.

അയ്യപ്പ ഭക്തന്മാര്‍ക്ക് വേണ്ടി ഹാജരായ വി കെ ബിജുവാണ് ഹര്‍ജികള്‍ തുറന്ന കോടതിയില്‍ പരിഗണിക്കണെെമന്ന് ആവശ്യപ്പെട്ടത്. ഇത് മോശമായ നടപടിക്രമമാണെന്നും ചീഫ് ജസ്റ്റിസ് ചൂണ്ടിക്കാണിച്ചു. ഇതോടെ ഉച്ചക്കുശേഷം 49 പുനപരിശോധനാ ഹര്‍ജികളും ചേമ്പറില്‍ തന്നെയായിരിക്കും പരിശോധിക്കുക.