തന്നെ സ്വാധീനിക്കാൻ ശ്രമം നടന്നതായി ജഡ്‌ജിയുടെ വെളിപ്പെടുത്തൽ

ന്യൂഡൽഹി: ഹോട്ടൽ റോയൽ പ്ലാസ കേസിൽ തന്നെ സ്വാധീനിക്കാൻ ശ്രമം നടന്നെന്ന് സുപ്രീം കോടതി ജഡ്ജി ഇന്ദിര ബാനർജി. ചിലർ തന്നെ സ്വാധീനിക്കാൻ ശ്രമിച്ചതായി തുറന്ന കോടതിയിലാണ് ജസ്റ്റിസ് തുറന്നു പറഞ്ഞത്. ഇത്തരത്തിൽ സുപ്രീം കോടതി ജഡ്‌ജിയെ സ്വാധീനിക്കാൻ ശ്രമിക്കുന്നത് കോടതിയെ അപമാനിക്കുന്നതിന് തുല്യമാണെന്ന് ജസ്റ്റിസ് അരുൺ മിശ്ര പ്രതികരിച്ചു.

ഇന്ദിര ബാനർജിയും അരുൺ മിശ്രയും ചേർന്ന ബെഞ്ച് കോടതി നമ്പർ എട്ടിൽ വാദം കേൾക്കുന്നതിനിടെയാണ് വെളിപ്പെടുത്തൽ ഉണ്ടായത്. ഓഗസ്റ്റ് 30നാണ് ഇന്ദിര ബാനർജി ഇങ്ങനെ വെളിപ്പെടുത്തിയത്. ജഡ്ജിമാരെ സ്വാധീനിക്കാൻ നടത്തുന്ന ശ്രമം ഗൗരവമുള്ളതാണെന്നും അതിനെതിരെ നടപടി വേണമെന്നും ഇന്ദിര ബാനർജി ആവശ്യപ്പെട്ടു.

ഹോട്ടൽ റോയൽ പ്ലാസ കേസ് വാദം കേൾക്കുന്നതിൽ നിന്ന് പിന്മാറരുതെന്ന് മുതിർന്ന അഭിഭാഷകൻ ശ്യാം ദിവാൻ ഇന്ദിര ബാനർജിയോട് അപേക്ഷിച്ചിരുന്നു. ജഡ്ജിയുടെ വെളിപ്പെടുത്തൽ വന്നതോടെ കേസിന്റെ വിധി പ്രസ്താവം മാറ്റി വെച്ചു. ഫോൺ വഴിയാണ് തന്നെ സ്വാധീനിക്കാനുള്ള ശ്രമം നടന്നതെന്നും ഇന്ദിര ബാനർജി പറഞ്ഞിരുന്നു.