വീട് ഭർത്താവിൻ്റേതല്ലായിരിക്കാം, പക്ഷെ ഭാര്യയെ ഇറക്കി വിടാനാകില്ല: സുപ്രീം കോടതി ഉത്തരവ്

ന്യൂഡൽഹി: സ്ത്രീകളുടെ സുരക്ഷ ലക്ഷ്യം നിര്‍ത്തിയുള്ള ഗാര്‍ഹിക പീഡന നിയമം സംബന്ധിച്ച് നിര്‍ണായക ഉത്തരവുമായി സുപ്രീം കോടതി. 2005ലെ ഗാര്‍ഹിക പീഡന നിയമപ്രകാരം സ്ത്രീകള്‍ പരാതി നല്‍കിയാലും അവര്‍ക്ക് ഭര്‍ത്താവ് താമസിക്കുന്ന വീട്ടിൽ തുടരാൻ അവകാശമുണ്ടെന്നാണ് കോടതി വ്യക്തമാക്കിയത്.

സ്ത്രീകളെ വീട്ടിൽ നിന്ന് ഇറക്കി വിടുന്ന സംഭവങ്ങളുടെ പശ്ചാത്തലത്തിലാണ് സുപ്രീം കോടതിയുടെ നിര്‍ണായക ഉത്തരവ്. വീട് ഭര്‍ത്താവിൻ്റെ മാതാപിതാക്കളുടെ ഉടമസ്ഥതയിലുള്ളതോ അവര്‍ വാടകയ്ക്ക് എടുത്തതോ ആണെങ്കിലും ഭര്‍ത്താവിന് വീടിനു മേൽ ഒരു അവകാശവുമില്ലെങ്കിലും സ്ത്രീകള്‍ക്ക് ആ വീട്ടിൽ കഴിയാമെന്നാണ് കോടതി ഉത്തരവിട്ടത്. ബന്ധുക്കള്‍ ഒരുമിച്ചു താമസിക്കുന്ന വീടുകളിൽ വിവാഹം കഴിഞ്ഞെത്തിയ സ്ത്രീകളുടെ അവകാശങ്ങള്‍ സംബന്ധിച്ചാണ് കോടതി വ്യക്തത വരുത്തിയത്.

Also Read: വിജയം കാണുമോ ചൈനയുടെ വാക്സിൻ? 750 കോടി ജനങ്ങളിലേയ്ക്ക് കൊവിഡ് വാക്സിൻ എത്തിത്തുടങ്ങാൻ ആഴ്ചകൾ മാത്രം ബാക്കി

പരാതിക്കാരിയായ സ്ത്രീ അവരുടെ ഭര്‍ത്താവിനോ പങ്കാളിയ്ക്കോ ഒപ്പം കഴിഞ്ഞ വീടിന് സ്ത്രീയ്ക്കും അവകാശമുണ്ടെന്ന് കോടതി വ്യക്തമാക്കി. വീട് ഭര്‍ത്താവിൻ്റെ മാതാപിതാക്കളുടേതോ ബന്ധുക്കളുടേതാ ആണെങ്കിലും വാടകവീടാണെങ്കിലും ഇത് ബാധകമാണെന്നും കോടതി വ്യക്തമാക്കി. സ്ത്രീയെ വീട്ടിൽ നിന്നു പുറത്താക്കണമെങ്കിൽ അതിനായി പ്രത്യേകം പരാതി നല്‍കണമെന്നും കോടതി വ്യക്തമാക്കി. ഭര്‍ത്താവിൻ്റെ ഉടമസ്ഥതയിലോ ഭര്‍ത്താവിന് അവകാശമുള്ളതോ ആയ വീട്ടിൽ മാത്രമേ ഭാര്യയ്ക്ക് അവകാശമുന്നയിക്കാനാകൂ എന്ന വിധി റദ്ദാക്കിക്കൊണ്ടാണ് കോടതിയുടെ പുതിയ വിധി. ജസ്റ്റിസ് അശോക് ഭൂഷൺ, ആര്‍എസ് റെഡ്ഡി, എംആ‍ ഷാ എന്നിവരടങ്ങിയ ബെഞ്ചിൻ്റേതാണ് ഉത്തരവ്.

Also Read: മുന്നണി പ്രവേശനം ഉടന്‍; ഭാവി പരിപാടികള്‍ ആലോചിച്ച് തീരുമാനിക്കുമെന്ന് ജോസ് കെ മാണി

ഗാര്‍ഹിക പീഡനനിയമപ്രകാരം സ്ത്രീകള്‍ നല്‍കിയ കേസുകള്‍ പരിഗണിക്കുന്നതിനിടെ ഭര്‍ത്താവും ബന്ധുക്കളും സ്ത്രീകളെ വീട്ടിൽ നിന്നിറക്കിവിടാനുള്ള ഭീഷണിയിൽ നിന്ന് പൂര്‍ണ സംരക്ഷണം നല്‍കുന്നതാണ് പുതിയ ഉത്തരവ്.