കെജ്‍രിവാളിന് ആശ്വാസമായി സുപ്രീംകോടതി വിധി

ന്യൂഡല്‍ഹി: ലഫ്‍റ്റനന്‍റ്‍ ഗവര്‍ണറുമായുള്ള അധികാര തര്‍ക്കത്തില്‍ ഡല്‍ഹി മുഖ്യമന്ത്രി അരവിന്ദ് കെജ്‍രിവാളിന് അനുകൂലമായി സുപ്രീംകോടതി വിധി. ഗവര്‍ണര്‍ക്ക് ഒറ്റയ്ക്ക് തീരുമാനങ്ങള്‍ എടുക്കാനാകില്ല, സര്‍ക്കാര്‍ നയങ്ങള്‍ തടസപ്പെടുത്താന്‍ കഴിയില്ല, സര്‍ക്കാരിനെ സഹായിക്കാന്‍ ഗവര്‍ണര്‍ ബാധ്യസ്ഥനാണ് - സുപ്രീംകോടതി വിധിച്ചു.

അഞ്ചംഗ ഭരണഘടന ബഞ്ചിന്‍റെതാണ് വിധി. ലഫ്. ഗവര്‍ണറും മുഖ്യമന്ത്രിയും താനാണ് വലുതെന്ന രീതിയില്‍ പെരുമാറരുത് എന്നും സുപ്രീംകോടതി ആവശ്യപ്പെട്ടു.

ജനാധിപത്യത്തിന്‍റെ വിജയമാണിതെന്ന് നേരത്തെ ഗവര്‍ണറുടെ വസതിയില്‍ അനുമതിയില്ലാതെ നിരാഹാരം കിടന്ന കെജ്‍രിവാള്‍ ട്വീറ്റ് ചെയ്‍തു.


ഡല്‍ഹിയിലെ നാഷണല്‍ കാപ്പിറ്റല്‍ ടെറിറ്ററി (എന്‍സിടി ആര് ഭരിക്കും എന്നതിനെ ചൊല്ലിയാണ് കേന്ദ്രസര്‍ക്കാര്‍ നോമിനിയായ ഗവര്‍ണറും, ഡല്‍ഹിയുടെ മുഖ്യമന്ത്രിയായ അരവിന്ദ് കെജ്‍രിവാളും തമ്മില്‍ തര്‍ക്കം തുടങ്ങിയത്.

അധികാര പരിധിക്ക് പുറത്തുള്ള കാര്യങ്ങളാണ് കെജ്‍രിവാള്‍ ചെയ്യുന്നതെന്നാണ് ഗവര്‍ണറുടെ പരാതി. പോലീസ് ഉള്‍പ്പെടെയുള്ള നിയമവാഴ്‍ച്ച സംവിധാനങ്ങള്‍ ഗവര്‍ണറാണ് കൈകാര്യം ചെയ്യുന്നത്.