സുപ്രീംകോടതി അയോധ്യ കേസ് ഇന്ന് പരിഗണിക്കും

ന്യൂഡല്‍ഹി: സുപ്രീം കോടതി അയോധ്യയിലെ തര്‍ക്ക ഭൂമിയുമായി ബന്ധപ്പെട്ട കേസ് ഇന്ന് പരിഗണനയ്ക്ക് എടുക്കും. ഉച്ചക്ക് രണ്ട് മണിക്ക് ചീഫ് ജസ്റ്റിസ് ദീപക് മിശ്ര, ജസ്റ്റിസുമാരായ അശോക് ഭൂഷണ്‍, എസ് അബ്ദുല്‍ നസീര്‍ എന്നിവരടങ്ങിയ ബെഞ്ച് കേസ് പരിഗണിക്കും. കേസില്‍ അന്തിമ വാദം ആരംഭിക്കേണ്ട തീയ്യതിയും ഇന്ന് കോടതി തീരുമാനിക്കും. അയോധ്യയിലെ ബാബറി മസ്ജിദ് ഭൂമി തര്‍ക്ക കേസ് തികച്ചും ഭൂമിതര്‍ക്കം മാത്രമായാവും പരിഗണിക്കുകയെന്നു സുപ്രീം കോടതി ഇതിനോടകം വ്യക്തമാക്കിയിരുന്നു.

കേസുമായി ബന്ധപ്പെട്ട രേഖകളായ രാമായണം, രാമചരിതമാനസം, ഭഗവത്ഗീത ഉള്‍പ്പടെ ആകെ 524 രേഖകള്‍ ലഭ്യമാക്കിയിട്ടുണ്ട്. ഉത്തര്‍പ്രദേശ് സര്‍ക്കാരിനു വേണ്ടി ഹാജരായ അഡീഷനല്‍ സോളിസിറ്റര്‍ ജനറല്‍ തുഷാര്‍ മേത്ത കഴിഞ്ഞ തവണ കോടതിയില്‍ ഹാജരായപ്പോൾ വ്യക്തമാക്കിയതാണ് ഇക്കാര്യം. ഹൈക്കോടതി പരിഗണിച്ചതും പ്രാദേശിക ഭാഷകളിലുള്ളതുമായ ചില രേഖകളുടെ പരിഭാഷ പൂര്‍ത്തിയാകാത്തതിനാൽ വാദം കേള്‍ക്കല്‍ മാറ്റിവെച്ചിരിക്കുകയായിരുന്നു. എല്ലാ രേഖകളുടെയും പരിഭാഷ പൂര്‍ത്തിയായതായി ഉത്തര്‍പ്രദേശ് സര്‍ക്കാര്‍ ഇന്ന് കോടതിയെ അറിയിക്കാനാണ് സാധ്യത.