മണ്ണിൽ ജീ‍ർണ്ണിച്ചുചേരുന്ന സുവിധ പാഡുകൾ വിപണിയിൽ

ബെംഗലുരു: കേന്ദ്രസർക്കാരിന്റെ സുവിധ പാഡ് വിപണിയിലെത്തി. രണ്ടര രൂപയാണ് പാഡിന്റെ വില. രാജ്യത്ത് ഇതാദ്യമായാണ് മണ്ണിൽ ജീർണിച്ചു ചേരുന്ന സാനിറ്ററി നാപ്കിനുകൾ ഉല്പാദിപ്പിക്കപ്പെടുന്നത്. പ്രധാനമന്ത്രി ഭാരതീയ ജൻഔഷധി പരിയോജനയ്ക്കു കീഴിൽ ആണ് പദ്ധതി നടപ്പിലാക്കിയിരിക്കുന്നത്. നാപ്കിനുകൾ രാജ്യത്തെ 3200 ജൻ ഔഷധികേന്ദ്രങ്ങൾ വഴി പൊതുജനങ്ങൾക്ക് ലഭ്യമാക്കും.

അന്തരീക്ഷ വായുവുമായി സമ്പർക്കത്തിൽ വരുമ്പോൾ നശിക്കുന്നതിനാൽ പരിസ്ഥിതി സൗഹൃദവുമാണ്. രാജ്യത്ത് ഇതാദ്യമായാണ് സമ്പൂർണ പരിസ്ഥിതി സൗഹൃദ നാപ്കിൻ വിപണിയിലിറങ്ങുന്നത്. ബി പി പി ഐ (ബ്യൂറോ ഓഫ് ഫാർമ പി എസ് യു) ആണ് ഇത്തരത്തിലുള്ള സാനിറ്ററി നാപ്കിനുകൾ ഉല്പാദിപ്പിച്ചിരിക്കുന്നത്. നിലവിൽ ഉപയോഗിക്കുന്ന സാനിറ്ററി നാപ്കിനുകൾ മണ്ണിൽ ലയിച്ചു ചേരാൻ 500 വർഷം വരെയെടുക്കുമ്പോൾ പുതുതായി വിപണിയിൽ എത്തുന്ന സാനിറ്ററി നാപ്കിനുകൾ മണ്ണിൽ ലയിക്കാൻ ആറുമാസം മാത്രമാണ് എടുക്കുന്നതെന്നതാണ് പ്രത്യേകത.