ആമിറിനെതിരെ ഉള്ള പരാമര്‍ശം: പരീക്കറിന് സ്വാമിയുടെ പിന്തുണ

ന്യൂഡല്‍ഹി: ആമിര്‍ ഖാനെ വിമര്‍ശിച്ച് വിവാദത്തിലായ പ്രതിരോധ മന്ത്രി മനോഹര്‍ പരീക്കറിന് പിന്തുണയുമായി ബിജെപി എംപി സുബ്രഹ്മണ്യന്‍ സ്വാമി രംഗത്ത്. ട്വിറ്ററിലൂടെയാണ് സ്വാമി പിന്തുണ അറിയിച്ചത്. 'എന്തിനാണ് ആമിറുമായി ബന്ധപ്പെട്ട പരീക്കറിന്‍റെ പ്രസ്താവനയിൽ ഇത്രയും ബഹളം വയ്ക്കുന്നത്? 'ജൻമ ഭൂമിയെ' സ്‍നേഹിക്കാന്‍ ആമിറിന് സാധിക്കില്ലെങ്കില്‍ അദ്ദേഹത്തിന് ഒരു ടീച്ചറെ ആവശ്യമാണ്' എന്നായിരുന്നു സ്വാമിയുടെ ട്വീറ്റ്.

Why so much hu ha about Parrikar's statement on Amir? If Amir is ignorant that to love janma bhoomi is unconditional then he needs a teacher — Subramanian Swamy (@Swamy39) August 1, 2016 പ്രതിപക്ഷ പാര്‍ട്ടികള്‍ പരീക്കറെ എതിര്‍ത്തുകൊണ്ട് രംഗത്തെത്തിയപ്പോഴാണ് സ്വാമിയുടെ ട്വീറ്റ്. താനൊരു താരത്തിന്‍റെയും പേരെടുത്ത് പറഞ്ഞിട്ടില്ല എന്ന് പരീക്കര്‍ വിഷയത്തില്‍ വിശദീകരിക്കാനും ശ്രമിച്ചിരുന്നു. രാജ്യം വിട്ടുപോകുമെന്ന ആമിർ ഖാന്‍റെ പ്രസ്താവന ധിക്കാരമായിരുന്നു എന്നാണ് പുണെയിലെ ചടങ്ങിൽ മനോഹർ പരീക്കര്‍ പ്രസംഗിച്ചത്. രാജ്യദ്രോഹപരമായ പ്രസ്‍താവനകള്‍ നടത്തുന്നവരെ ജനങ്ങള്‍ പാഠം പഠിപ്പിക്കുമെന്നും പരീക്കര്‍ മുന്നറിയിപ്പ് നല്‍കി.

രാജ്യത്ത് അരങ്ങേറുന്ന അക്രമസംഭവങ്ങളില്‍ ഉത്‍കണ്ഠ പൂണ്ട ഭാര്യ കിരണ്‍ രാജ്യം വിട്ടു പോകുമെന്ന് തന്നോട് പറഞ്ഞു എന്ന് കഴിഞ്ഞ നവംബറില്‍ നടത്തിയ പ്രസ്താവനയാണ് വിവാദത്തിന് ആധാരം.