തമിഴ്നാട്ടിൽ 110 പേർക്ക് കൂടി കൊവിഡ്; എല്ലാവരും നിസാമുദ്ദീൻ തബ് ലീഗുമായി ബന്ധമുള്ളവർ

ചെന്നൈ: തമിഴ്നാട്ടിൽ 110 പേർക്ക് കൂടി കൊവിഡ്-19 സ്ഥിരീകരിച്ചു. ഇതോടെ സംസ്ഥാനത്തെ ആകെ രോഗബാധിരുടെ എണ്ണം 234 ആയി ഉയർന്നിട്ടുണ്ട്. ഇന്ന് രോഗം സ്ഥിരീകരിച്ച 110 പേരും ഡൽഹി നിസാമുദ്ദീനിലെ തബ് ലീഗ് മസ്ജിദിൽ നടന്ന മതസമ്മേളനവുമായി ബന്ധമുള്ളവരാണ്. നാഷണൽ ഹെൽത്ത് മിഷനാണ് ഇക്കാര്യം വ്യക്തമാക്കിയത്. 15 ജില്ലകളിൽ നിന്നായാണ് 110 പുതിയ കേസുകൾ റിപ്പോർട്ട് ചെയ്തത്.

തിരുനെൽവേലി-6, കോയമ്പത്തൂർ-28, ഈറോഡ്-2, തേനി-20, ദിണ്ടിഗൽ-17, മധുരൈ-9, തിരുപത്തുർ-7, ചെങ്കൽപേട്ട്-7, ശിവഗംഗൈ-5, തുത്തൂകുടി-2, തിരുവാരൂർ-2, കാരുർ-1, കാഞ്ചിപുരം-2, ചെന്നൈ-1 തിരുവന്മലൈ-1 എന്നിങ്ങനെയാണ് ഇന്ന് രോഗം സ്ഥിരീകരിച്ച കണക്കുകൾ.

Also Read: കേരളത്തിൽ ഇന്ന് 24 പേർക്ക് കൊവിഡ്-19 സ്ഥിരീകരിച്ചെന്ന് മുഖ്യമന്ത്രി; വിശദാംശങ്ങൾ

അതേസമയം തബ് ലീഗ് സമ്മേളനവുമായി ബന്ധപ്പെട്ട് സംസ്ഥാനത്ത് ഭയപ്പെടേണ്ട ആവശ്യമില്ലെന്ന് മുഖ്യമന്ത്രി പിണറായി വിജയൻ പറഞ്ഞു. സമ്മേളനത്തിൽ പങ്കെടുത്ത 60 പേരാണ് സംസ്ഥാനത്ത് നിരീക്ഷണത്തിലുള്ളത്. ഭയപ്പെടേണ്ട സ്ഥിതിയില്ല. ആരാധനാലയം, വിവാഹം, തുടങ്ങിയ ചടങ്ങുകളിൽ ധാരാളം പേർ പങ്കെടുത്തു. ഈ ഘട്ടത്തിലാണ് ഇവയെല്ലാം ഒഴിവാക്കണമെന്ന് നിർദ്ദേശിച്ചതെന്നും അദ്ദേഹം പറഞ്ഞു.

പ്രത്യേക ഉദ്ദേശത്തോടെ ചില പ്രചാരണം നടക്കുന്നുണ്ടെന്ന് പറഞ്ഞ പിണറായി വിജയൻ തബ് ലീഗ് സമ്മേളനത്തെ കുറിച്ചും അതിൽ പങ്കെടുത്തവരെ കുറിച്ചും അവരുടെ മതത്തെ കുറിച്ചും അസഹിഷ്ണുതയോടെ പ്രചാരണം ചിലർ അടിച്ചുവിടുകയാണെന്നും വിമർശിച്ചു. സംസ്ഥാനത്ത് ഇന്ന് 24 പേർക്കാണ് കൊവിഡ്-19 സ്ഥിരീകരിച്ചത്. ഇതോടെ ഇതുവരെ രോഗം സ്ഥിരീകരിച്ചവരുടെ എണ്ണം 265 ആയി ഉയർന്നു. കാസർകോട് 12 പേർക്കാണ് ഇന്ന് രോഗം സ്ഥിരീകരിച്ചത്. എറണാകുളത്ത് മൂന്ന്, തിരുവനന്തപുരം രണ്ട്, പാലക്കാട് ഒന്ന് എന്നിങ്ങനെയാണ് മറ്റ് കണക്കുകൾ.