ദുരിതാശ്വാസനിധിയിലേക്ക് അകമഴിഞ്ഞ് തമിഴ്നാട്

ചെന്നൈ: കേരളം നേരിടുന്ന ദുരിതത്തിനെ അതിജീവിക്കാനായി തമിഴ്നാടിന്‍റെ അകമഴിഞ്ഞ സഹായം. തമിഴ്നാട് മുഖ്യമന്ത്രി എടപ്പാടി പളനിസ്വാമിയും മറ്റു മന്ത്രിമാരും തങ്ങളുടെ ഒരു മാസത്തെ ശമ്പളം മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭാവന ചെയ്യും. മന്ത്രിസഭയ്ക്കു പുറമേ എഐഎഡിഎംകെയുടെ എല്ലാ എംഎല്‍എമാരും എംപിമാരും തങ്ങളുടെ ഒരു മാസത്തെ ശമ്പളം പ്രളയക്കെടുതി നേരിടുന്നവര്‍ക്കായി കൈമാറും.

ഡിഎംകെയുടെ എംഎല്‍എമാരും എംപിമാരും ഒരു മാസത്തെ ശമ്പളം ദുരിതാശ്വാസ ഫണ്ടിലേക്ക് കൈമാറും. ഡിഎംഡികെയുടെ അധ്യക്ഷനും നടനുമായ വിജയകാന്തും ഒരു കോടി രൂപ ദുരിതബാധിതര്‍ക്ക് നല്‍കുമെന്ന് പ്രഖ്യാപിച്ചിട്ടുണ്ട്.

തമിഴ്നാട് സര്‍ക്കാര്‍ നേരത്തെ അഞ്ചുകോടി രൂപ കേരളത്തിന് കൈമാറിയിരുന്നു. വീണ്ടുമൊരു അഞ്ചുകോടി രൂപയും കൂടി സഹായമായി പ്രഖ്യാപിച്ചിട്ടുണ്ട്. ദിവസവും ദുരിതാശ്വാസ കേന്ദ്രങ്ങളിലേക്ക് നിരവധി സാധനങ്ങളും തമിഴ്നാട്ടില്‍നിന്ന് എത്തുന്നുണ്ട്.