'സ്മാര്‍ട് ഫോണ്‍ വാങ്ങൂ, ഒരു കിലോ ഉള്ളി സൗജന്യമായി നേടൂ'; വേറിട്ട പരസ്യവുമായി മൊബൈല്‍ ഷോപ്പ്

ചെന്നൈ: രാജ്യത്ത് ഉള്ളി വില കുതിച്ചുയരുന്ന സാഹചര്യത്തില്‍ വേറിട്ട പരസ്യവുമായി ഒരു മൊബൈല്‍ ഷോപ്പ്. സ്മാര്‍ട് ഫോണ്‍ വാങ്ങിയാല്‍ ഒരു കിലോ ഉള്ളി സൗജന്യമായി ലഭിക്കുമെന്നാണ് കട ഉടമകള്‍ പറയുന്നത്. തഞ്ചാവൂര്‍ ജില്ലയിലെ പാട്ടുകൊട്ടെയിലെ തലയരി സ്ട്രീറ്റിലുള്ള എസ്ടിആര്‍ മൊബൈല്‍സ് ആണ് പരസ്യവുമായി ശ്രദ്ധ നേടുന്നത്.

പരസ്യം കാഴ്ചക്കാരുടെ ശ്രദ്ധ പിടിച്ചുപറ്റുക മാത്രമല്ല, ആളുകളില്‍ ആകാംഷയും സൃഷ്ടിച്ചിട്ടുണ്ട്. തമിഴ്‌നാട്ടില്‍ നിലവില്‍, ഒരു കിലോ വലിയ ഉള്ളി 140 രൂപയ്ക്കും ഒരു കിലോ ചെറിയ ഉള്ളി 160 രൂപയ്ക്കും ആണ് വില്‍ക്കുന്നത്. ഈ ഓഫര്‍ ജനങ്ങളുടെ ഇടയില്‍ വളരെ മികച്ച സ്വീകരണം ആണെന്ന് എസ്ടിആര്‍ മൊബൈല്‍സ് ഉടമ ശരവണ കുമാര്‍ പറഞ്ഞു.

'പാട്ടുകൊട്ടെയിലെ ആരും ഇത്തരത്തില്‍ ഒരു ഓഫറിനെ കുറിച്ച് കേട്ടിട്ടില്ല. അതുകൊണ്ട് എല്ലാവരിലും കൗതുകം ഉണര്‍ത്തിയിട്ടുണ്ട്. പരസ്യം പുറത്തുവിട്ടതിനു ശേഷം നിരവധി ആളുകളാണ് കടയില്‍ വരുന്നത്', കടയുടമ പറഞ്ഞു.

'പാട്ടുകൊട്ടെയില്‍ എട്ടു വര്‍ഷം മുമ്പാണ് എസ്ടിആര്‍ മൊബൈല്‍സ് ആരംഭിക്കുന്നത്. ശരാശരി രണ്ട് മൊബൈല്‍ ഫോണുകളാണ് ദിവസേന കടയില്‍ വിറ്റുകൊണ്ടിരുന്നത്. എന്നാല്‍, പരസ്യം പുറത്തുവിട്ടതിനു ശേഷം വ്യാഴാഴ്ചയും വെള്ളിയാഴ്ചയും ദിവസേന 8 ഫോണുകള്‍ വീതം വില്‍പ്പന നടത്താനായി. ആളുകള്‍ക്ക് ഈ ഓഫര്‍ ഇഷ്ടപ്പെട്ടിട്ടുണ്ട്', ശരവണ പറഞ്ഞു. കടയില്‍ വരുന്ന ആളുകള്‍ക്ക് ചെറിയ ഉള്ളിയും വലിയ ഉള്ളിയും സൗജന്യമായി തെരഞ്ഞെടുക്കാമെന്ന് അദ്ദേഹം കൂട്ടിച്ചേര്‍ത്തു.

'ഉള്ളി വില ഉയര്‍ന്നത് വളരെ ബുദ്ധിമുട്ടുള്ള കാര്യമാണ്. ഭക്ഷണം ഞങ്ങള്‍ക്ക് വളരെ പ്രധാനപ്പെട്ടതാണ്. വിലകള്‍ സാധാരണ നിലയില്‍ എത്തുന്നതു വരെ കുറച്ചു രൂപ എടുക്കുന്നതില്‍ കുഴപ്പമില്ല. മാന്യമായ ഭക്ഷണം കഴിച്ച് എന്റെ കുടുംബം സന്തുഷ്ടരാണെന്ന് ഉറപ്പുവരുത്താന്‍ എനിക്ക് ഇത്രയേ ചെയ്യാനാകൂ', അദ്ദേഹം വ്യക്തമാക്കി.