ശബരിമലയിലേക്കുള്ള ആക്ടിവിസ്റ്റുകളുടെ ആവേശത്തെ മനസിലാകുന്നില്ലെന്ന് തസ്ലിമ നസ്രീന്‍

ന്യൂഡല്‍ഹി: ശബരിമലയിലേക്കുള്ള ആക്ടിവിസ്റ്റുകളുടെ നീക്കത്തെ വിമര്‍ശിച്ച് ബംഗ്ലാദേശി എഴുത്തുകാരി തസ്ലിമ നസ്രീന്‍ . തന്‍റെ ട്വിറ്റര്‍ അക്കൗണ്ടിലൂടെയാണ് തസ്ലിമ ഇക്കാര്യം കുറിച്ചത്.

ശബരിമലയില്‍ പ്രവേശിക്കണമെന്ന ആവേശത്തെ തനിക്ക് മനസിലാകുന്നില്ല. അവര്‍ ഗ്രാമങ്ങളിലേക്ക് ഇറങ്ങി ചെല്ലുന്നതാണ് നല്ലത്. അവിടെ അവര്‍ക്ക് വെല്ലുവിളികള്‍ നേരിടുന്ന സ്ത്രീകളെ സഹായിക്കാനാകുമെന്ന് തസ്ലിമ നസ്രീന്‍ പറയുന്നു.

ലൈംഗിക ചൂഷണം, വിദ്യാഭ്യാസം, തുല്യവേതനം തുടങ്ങിയവയൊക്കെ സ്ത്രീകള്‍ക്ക് ലഭ്യമാക്കാന്‍ ആക്ടിവിസ്റ്റുകള്‍ക്ക് കഴിയുമെന്ന് തസ്ലിമ വിവരിക്കുന്നു.


ഇന്നലെയാണ് ഭൂമാതാ ബ്രിഗേഡ് നേതാവ് തൃപ്തി ദേശായി ശബരിമല ദദര്‍ശനത്തിനായി നെടുമ്പാശ്ശേരി വിമാനത്താവളത്തിലെത്തിയത്. എന്നാല്‍ ബിജെപിയുടെയും അയ്യപ്പ കര്‍മ്മ സമിതിയുടെയും നേതൃത്വത്തിലുള്ള ശക്തമായ പ്രതിഷേധത്തെ തുടര്‍ന്ന് ശബരിമല ദര്‍ശനത്തില്‍ നിന്ന് തൃപ്തി പിന്മാറുകയായിരുന്നു.

അതേസമയം ശബരിമലയിലേക്കെത്തിയ ഹിന്ദു ഐക്യവേദി സംസ്ഥാന അധ്യക്ഷ കെ പി ശശികലയെ അറസ്റ്റ് ചെയ്തതിനെ പ്രതിഷേധിച്ച് സംസ്ഥാനത്ത് ഹര്‍ത്താല്‍ പ്രഖ്യാപിച്ചിരിക്കുകയാണ്.