ജിഎസ്‍‍ടി: പ്രതീക്ഷിച്ചത്ര നികുതി വരുമാനം ഉണ്ടായേക്കില്ല

മുംബൈ: ജിഎസ്‍‍ടി നടപ്പാക്കിയതുമൂലം പ്രതീക്ഷിച്ചത്ര നികുതി വരുമാനം ഈ വര്‍ഷം കേന്ദ്രസര്‍ക്കാരിന് ലഭിച്ചേക്കില്ലെന്ന് എക്സൈസ്-കസ്റ്റംസ് വിഭാഗത്തിന്‍റെ മുന്നറിയിപ്പ്. ലക്ഷ്യം നേടിയെടുക്കാൻ സാധിച്ചേക്കില്ലെന്ന് സെൻട്രൽ ബോര്‍ഡ് ഓഫ് എക്സൈസ് ആൻ്റ് കസ്റ്റംസ് ചെയര്‍പേഴ്സണ്‍ വനജ എൻ സര്‍ന പറഞ്ഞു. കസ്റ്റംസ് വകുപ്പ് സംഘടിപ്പിച്ച ഹാഫ് മാരത്തോണിനോടനുബന്ധിച്ച് സംസാരിക്കവേയാണ് ചെയര്‍പേഴ്സൻ്റെ വെളിപ്പെടുത്തൽ.

ഈ സാമ്പത്തികവര്‍ഷം സര്‍ക്കാര്‍ പ്രതീക്ഷിക്കുന്നതുപോലെ 9.68 ലക്ഷം കോടി രൂപ ചരക്കുസേവനനികുതിയിലൂടെയം കസ്റ്റംസ് നികുതിയിനത്തിലൂടെയും നേടാനാവില്ലെന്നാണ് വനജയുടെ മുന്നറിയിപ്പ്. എന്നാൽ ഈ സാഹചര്യത്തിൽ സര്‍ക്കാരിന്‍റെ വരുമാനലക്ഷ്യത്തിൽ മാറ്റം വരുത്തില്ലെന്നും വനജ കൂട്ടിച്ചേര്‍ത്തു. ഏതാനും മാസങ്ങള്‍ കൊണ്ട് ജിഎസ്‍‍ടിയുമായി ബന്ധപ്പെട്ട പ്രശ്നങ്ങള്‍ തീരുമെന്നും അതുവരെ കാത്തിരിക്കാമെന്നുമാണ് കേന്ദ്രസര്‍ക്കാരിന്‍റെ തീരുമാനം.

അടുത്ത അഞ്ചാറു മാസം കൊണ്ട് ജിഎസ്ടിയുമായി ബന്ധപ്പെട്ട പ്രശ്നങ്ങൾ തീരുമെന്നാണു പ്രതീക്ഷിക്കുന്നത്. അതുവരെ കാത്തിരിക്കാനാണു സർക്കാരിന്റെയും തീരുമാനം. നികുതി അടയ്ക്കുന്നതിലെ പാളിച്ചകളുടെ പേരിൽ വ്യാപാരികൾക്കു പിഴ ചുമത്തേണ്ടെന്നും തീരുമാനിച്ചിട്ടുണ്ട്.

കയറ്റുമതിക്കാർക്കുള്ള റീഫണ്ട് ഇനത്തിൽ ഇതുവരെ 200 കോടി രൂപയ്ക്കടുത്ത് നൽകിയിട്ടുണ്ടെന്നും വനജ പറഞ്ഞു. സാമ്പത്തിക മന്ത്രാലയത്തിന്റെ കീഴിൽ റവന്യൂ വകുപ്പിന്റെ ചുമതലയിലാണ് ബോർഡിന്റെ പ്രവർത്തനം.

GST: Tax Revenue unlikely to be higher as expected

Central board of excise and customs Chairperson said that the tax revenue from current financial year will not be higher as expected.