തെലങ്കാന മന്ത്രിസഭ പിരിച്ചുവിടുന്നതായി സൂചന

ഹൈദരാബാദ്: കാലാവധി പൂർത്തിയാക്കാതെ തെലങ്കാന മന്ത്രിസഭാ പിരിച്ചു വിട്ട് തെരഞ്ഞെടുപ്പിലേക്ക് നീങ്ങുന്നതായി സൂചന. ഇത് സംബന്ധിച്ച പ്രഖ്യാപനം തെലങ്കാന മുഖ്യമന്ത്രി കെ.ചന്ദ്രശേഖര റാവു നാളെ പ്രഖ്യാപിച്ചേക്കും. മധ്യപ്രദേശ്, രാജസ്ഥാന്‍, ചത്തീസ്ഗഢ്, മിസോറാം എന്നീ സംസ്ഥാനങ്ങൾക്കൊപ്പം തെലങ്കാനയും തെരഞ്ഞെടുപ്പിലേക്ക് നീങ്ങുന്നുവെന്നാണ് സൂചന. നാളെ ഉച്ചക്ക് ശേഷം വൻ ജനാവലിയെ സംഘടിപ്പിച്ചു കൊണ്ട് പൊതുയോഗം നടത്തുന്നുണ്ട്.

രംഗറെഡ്ഢി ജില്ലയിലെ 2000 ഏക്കർ സ്ഥലത്താണ് പൊതുയോഗം ചേരുന്നത്. പാർട്ടി നേതാവിൽ നിന്ന് സുപ്രധാന പ്രഖ്യാപനം പ്രതീക്ഷിക്കാമെന്ന് മുഖ്യമന്ത്രിയുടെ മകനും ഐടി മന്ത്രിയുമായ കെ.ടി.രാമറാവു എന്‍ഡിടിവിയെ അറിയിച്ചു. 2014 ജൂൺ രണ്ടിനാണ് തെലങ്കാന സംസ്ഥാനം രൂപീകരിച്ചത്.2019 മേയിലാണ് ടിആർഎസ് സർക്കാരിന്റെ കാലാവധി കഴിയുന്നത്. നാല് വർഷത്തെ ഭരണനേട്ടങ്ങളിലൂടെ വീണ്ടും ഭരണം പിടിക്കാൻ കഴിയുമെന്ന ചിന്തയിലാണ് ടിആർഎസ്. അതെ സമയം, ഈ നീക്കം മനസിലാക്കി അമിത് ഷാ ബിജെപി സംസ്ഥാന പാർട്ടി നേതാക്കളുടെ യോഗം വിളിച്ചു. ചന്ദ്രശേഖര റാവു കഴിഞ്ഞ ആഴ്ച പ്രധാനമന്ത്രിയുമായും ആഭ്യന്തരമന്ത്രിയുമായും ചർച്ച നടത്തിയിരുന്നു.