Hari Krishna Died: ജൂനിയര്‍ എന്‍ടിആറിന്‍റെ പിതാവ് വാഹനാപകടത്തിൽ മരിച്ചു

ഹൈദരാബാദ്: മുൻ ആന്ധ്രാ പ്രദേശ് മുഖ്യമന്ത്രി എൻ.ടി രാമറാവുവിന്‍റെ മകനും തെലുങ്കുദേശം പാർട്ടി നേതാവുമായ നന്ദമുരി ഹരികൃഷ്ണ (62) കാറപകടത്തിൽ മരിച്ചു. ഹൈദരാബാദില്‍ നിന്ന് നൂറ് കിലോമീറ്റര്‍ അകലെ നൽഗൊണ്ടയിൽ ബുധനാഴ്ച പുലർച്ചെയായിരുന്നു അപകടം.

അപകടത്തില്‍ ഗുരുതരമായി പരിക്കേറ്റ ഹരികൃഷ്‌ണയെ ഉടൻ തന്നെ ആശുപത്രിയില്‍ പ്രവേശിപ്പിച്ചെങ്കിലും മരണം സംഭവിക്കുകയായിരുന്നു. നെല്ലൂരില്‍ ഒരു വിവാഹ ചടങ്ങില്‍ പങ്കെടുക്കാന്‍ പോകുകയായിരുന്ന ഹരികൃഷ്ണയുടെ കാര്‍ ഡിവൈഡറില്‍ ഇടിച്ചാണ് അപകടമുണ്ടായിരിക്കുന്നത്. വാഹനം മറിയുന്നതിന് മുൻപ് മറ്റൊരു വണ്ടിയിലും ഇടിച്ചിരുന്നു. അമിത വേഗതയാണ് അപകടത്തിന് കാരണമെന്നാണ് പോലീസ് പറയുന്നത്.

തെലുങ്കുദേശം പാര്‍ട്ടിയുടെ സ്ഥാപകന്‍ കൂടിയായ എന്‍.ടി.ആറിന്‍റെ നാലാമത്തെ മകനാണ് ഹരിക‌ൃഷ്ണ. നടന്‍ കൂടിയായിരുന്ന ഹരികൃഷ്ണ 2008ല്‍ രാജ്യസഭാംഗമായിരുന്നു. സഹോദരന്‍ നന്ദമുരി ബാലകൃഷ്ണ തെുലങ്കിലെ അറിയപ്പെടുന്ന നടനാണ്. ലക്ഷ്‌മി ഹരികൃഷ്‌ണയാണ് ഭാര്യ. ജൂനിയര്‍ എന്‍.ടി.ആര്‍, നന്ദമുരി കല്യാണ രാമന്‍, ജാനകി രാം നന്ദമൂരി എന്നിവര്‍ മക്കളാണ്.