എല്ലാ എംപിമാ‍ര്‍ക്കും പ്രത്യേകം ഓഫീസ്; പുതിയ പാർലമെന്റ് നിർമ്മാണം ഡിസംബറിൽ ആരംഭിക്കും

ന്യൂഡൽഹി: പുതിയ പാർലമെന്റ് മന്ദിരത്തിന്റെ നിർമ്മാണം ഡിസംബറിൽ ആരംഭിക്കുമെന്ന് ലോക് സഭാ സെക്രട്ടറിയേറ്റ് വെള്ളിയാഴ്ച വ്യക്തമാക്കി. ഡിസംബറിൽ പണി ആരംഭിച്ച് 2022 ഒക്ടോബറിൽ പണി പൂർത്തിയാക്കും.

പുതിയ പാർലമെന്റ് കെട്ടിടത്തിൽ എല്ലാ എംപിമാർക്കും പ്രത്യേകം ഓഫീസ് ഉണ്ടായിരിക്കും. പേപ്പർ ഒഴിവാക്കുന്നതിന്റെ ഭാഗമായി ഈ ഓഫീസുകളിൽ ഡിജിറ്റൽ സൗകര്യം ഏ‍ര്‍പ്പെടുത്തും. കോൺസ്റ്റിറ്റ്യൂഷൻ ഹാൾ, ലൈബ്രറി, എംപിമാ‍‍ര്‍ക്കുള്ള വിശ്രമ കേന്ദ്രം, ഭക്ഷണമുറി അടക്കമുള്ളവയും പുതിയ കെട്ടിടത്തിൽ ഉണ്ടാകും.

Also Read: വാക്സിന്റെ പേരിൽ ബിജെപി ആളുകളുടെ ജീവിതം വെച്ച് കളിക്കുന്നുവെന്ന് കമൽ ഹാസൻ

പുതിയ കെട്ടിടം നി‍ര്‍മ്മിക്കുന്നതുവരെ നിലവിലുള്ള കെട്ടിടത്തിൽ പാ‍ര്‍ലമെന്റ് സെഷനുകളും പരിപാടികളും തടസമില്ലാതെ തുടരുമെന്ന് ലോക് സഭാ സെക്രട്ടറിയേറ്റ് വ്യക്തമാക്കി.

കെട്ടിടത്തിന്റെ നി‍ര്‍മ്മാണവുമായി ബന്ധപ്പെട്ടുള്ള ശബ്ദമലിനീകരണവും വായൂമലിനീകരണവും നിയന്ത്രിക്കാൻ നടപടിയെടുക്കുമെന്ന് ലോക്സഭാ സ്പീക്ക‍ര്‍ ഓം ബിര്‍ളയുടെ നേതൃത്വത്തിൽ ചേര്‍ന്ന അവലോകനയോഗം വ്യക്തമാക്കി.

Also Read: 'ബിഹാറിലെ തൊഴിലാളികൾ യാതന അനുഭവിച്ചു; ലോക്ക് ഡൗൺ കാലത്ത് മോദി സഹായിച്ചോ?'

ലോക്സഭാ മന്ദിരത്തിൽ ഒരേ സമയം 888 അംഗങ്ങൾക്ക് ഇരിക്കാൻ കഴിയും. അതേസമയം രാജ്യസഭാ ചേമ്പറിൽ ഒരേസമയം 384 പേ‍ര്‍ക്കും ഇരിക്കാം. രണ്ട് ഹൗസുകളിലും ഭാവിയിൽ ഉണ്ടായേക്കാവുന്ന അംഗസംഖ്യാ വ‍ര്‍ദ്ധനവ് മുൻകൂട്ടിക്കണ്ടാണ് ചേമ്പറുകൾ വിഭാവനം ചെയ്തിരിക്കുന്നത്.

നിലവിൽ ലോക്സഭയിൽ 543 അംഗങ്ങളും രാജ്യസഭയിൽ 245 അംഗങ്ങളുമാണ് ഉള്ളത്. 861.90 കോടി രൂപ ചെലവഴിച്ചാണ് കെട്ടിടത്തിന്റെ നി‍മ്മാണം നടത്തുന്നത്.