കൊവിഡ് വാക്‌സിന്‍ രാജ്യത്ത് എല്ലാവരിലേയ്ക്കും എത്തുമെന്ന് ഉറപ്പു തരുന്നു: പ്രധാനമന്ത്രി

ന്യൂഡല്‍ഹി: കൊവിഡ് വാക്‌സിന്‍ രാജ്യത്ത് എല്ലാവരിലേക്കും എത്തുമെന്ന് ഉറപ്പു തരുന്നതായി പ്രധാനമന്ത്രി നരേന്ദ്ര മോദി. 74ാം സ്വാതന്ത്ര്യദിനാഘോഷ ചടങ്ങിനിടെയാണ് പ്രധാനമന്ത്രി ഇക്കാര്യം പറഞ്ഞത്.

Also Read: ഇന്ന് 74-ാം സ്വാതന്ത്ര്യദിനം: കർശന സുരക്ഷ; ചെങ്കോട്ടയിൽ പതാകയുയർത്താൻ പ്രധാനമന്ത്രി


'കൊവിഡ് വാക്‌സിന്‍ എപ്പോള്‍ തയ്യാറാകുമെന്ന് എല്ലാവരും ആശ്ചര്യപ്പെടുന്നതായി അദ്ദേഹം പറഞ്ഞു. വാക്‌സിന്‍ വികസിപ്പിക്കുന്നതിന് ശാസ്ത്രജ്ഞരും കഠിനമായി പരിശ്രമിക്കുന്നുണ്ടെന്ന് എല്ലാ പൗരന്മാര്‍ക്കും ഉറപ്പ് നല്‍കുന്നു'.


'രാജ്യത്ത് മൂന്ന് പരീക്ഷണ വാക്‌സിനുകള്‍ വികസിപ്പിക്കുന്നതിന്റെ വ്യത്യസ്ത ഘട്ടങ്ങളിലാണിപ്പോള്‍. വാക്‌സിന്‍ വന്‍തോതില്‍ നിര്‍മ്മിക്കുകയും രാജ്യത്തെ എല്ലാ പൗരന്മാരിലേക്കും എത്തിക്കുകയും ചെയ്യുമെന്ന് ഉറപ്പാക്കും. ശാസ്ത്രജ്ഞന്മാരില്‍ നിന്ന് അനുമതി ലഭിക്കാല്‍ വാക്‌സിന്റെ വന്‍തോതിലുള്ള ഉത്പാദനം ആരംഭിക്കും', പ്രധാനമന്ത്രിയുടെ വാക്കുകള്‍.

Also Read: പുതിയ ഒരിന്ത്യ കെട്ടിപ്പടുക്കാനുള്ള പരിശ്രമത്തില്‍ നമുക്കൊന്നായി കൈകോര്‍ക്കാം; സ്വാതന്ത്ര്യദിനാശംസകള്‍ നേര്‍ന്ന് മുഖ്യമന്ത്രി

രാവിലെ ഏഴരയോടെയാണ് ഡല്‍ഹിയിലെ ചെങ്കോട്ടയില്‍ ചടങ്ങുകള്‍ ആരംഭിച്ചത്. പതാക ഉയര്‍ത്തലിനു മുമ്പ് അദ്ദേഹം സായുധസേനകളുടെ ഗാര്‍ഡ് ഓഫ് ഓണര്‍ സ്വീകരിച്ചു. തുടര്‍ച്ചയായി ഏഴാം തവണയാണ് നരേന്ദ്ര മോദി സ്വാതന്ത്ര്യദിനത്തില്‍ ചെങ്കോട്ടയില്‍ പതാക ഉയര്‍ത്തുന്നത്.

Also Read: മഹാരാഷ്‌ട്രയിൽ 364 മരണം; തമിഴ്‌നാട്ടിൽ 3,26,245 കൊവിഡ് കേസുകൾ, ഡൽഹിക്ക് ആശ്വാസം

കൊവിഡിനെതിരെ പോരാടുന്നവര്‍ക്ക് പ്രധാനമന്ത്രി നരേന്ദ്ര മോദി ആദരമര്‍പ്പിച്ചു. രാജ്യത്തിന്റെ കൊവിഡ് പോരാട്ടം വിജയിക്കുമെന്ന് അദ്ദേഹം പ്രത്യാശ പ്രകടിപ്പിച്ചു. ആരോഗ്യ പ്രവര്‍ത്തകര്‍ രാജ്യത്തിന് നല്‍കുന്നത് മഹനീയ സേവനമാണ്. നിശ്ചയദാര്‍ഢ്യം കൊണ്ട് കൊവിഡ് പ്രതിസന്ധിയെ മറികടക്കാന്‍ സാധിക്കുമെന്ന് മോദി വ്യക്തമാക്കി. കൊവിഡ് ഭീഷണിയ്ക്കിടയില്‍ കര്‍ശന നിയന്ത്രണത്തിലാണ് ചെങ്കോട്ടയില്‍ സ്വാതന്ത്ര്യദിനാഘോഷ ചടങ്ങ് നടക്കുന്നത്. രാജ്‌ഘോട്ടില്‍ രാഷ്ട്രപിതാവിന് ആദരാഞ്ജലി അര്‍പ്പിച്ച ശേഷമാണ് പ്രധാനമന്ത്രി ചെങ്കോട്ടയില്‍ എത്തിയത്.