മുംബൈയിൽ നിന്ന് മൃതദേഹത്തെ അനുഗമിച്ച് യാത്ര ചെയ്ത മൂന്ന് പേർക്ക് കൊവിഡ് 19

മൃതദേഹവുമായി മുംബൈയിൽ നിന്ന് യാത്ര ചെയ്ത ആറ് പേരിൽ മൂന്ന് പേർക്ക് കൊവിഡ് 19 സ്ഥിരീകരിച്ചു. 56 കാരന്റെ മൃതദേഹത്തെ അനുഗമിച്ചെത്തിയവ‍ക്കാണ് കർണാടകയിലെ മാണ്ഡ്യ ജില്ലയിൽ രോഗം സ്ഥിരീകരിച്ചത്. മുംബൈയിൽ ഓട്ടോ ഡ്രൈവറായിരുന്ന കർണാടക സ്വദേശി ഹൃദയാഘാതത്തെ തുടർന്നാണ് മരിച്ചത്. മൃതദേഹം നാട്ടിലെത്തിക്കാൻ അനുമതി വാങ്ങി ആറ് പേരാണ് ആംബുലൻസിൽ മാണ്ഡ്യയിലേക്ക് തിരിച്ചത്.

ശവസംസ്കാരത്തിനുശേഷം, മാണ്ഡ്യയിൽ ഇവരെ കൊറോണ വൈറസ് പരിശോധനയ്ക്ക് വിധേയമാക്കി. ഇതിൽ മൂന്ന് പേരുടെ ഫലം പോസിറ്റീവാണെന്ന് തെളിഞ്ഞു. മരിച്ചയാളുടെ ഭാര്യയുടെ ഫലം നെഗറ്റീവാണ്. പോരുന്ന വഴിക്ക് ഒരു സ്ത്രീക്കും മകനും ആംബുലൻസിൽ ലിഫ്റ്റ് നൽകിയിരുന്നു. ഈ സ്ത്രീയുടെ ഫലവും പോസിറ്റീവാണ്.

Also Read: ഇന്ത്യയില്‍ കൊറോണയുടെ ആയുസ്സ് എത്രനാള്‍? പഠന റിപ്പോര്‍ട്ട് ഇങ്ങനെ

മരിച്ച വ്യക്തിയുടെ മകന് കൊറോണ വൈറസ് ബാധിച്ചിരുന്നുവെന്നാണ് സൂചന. ഇയാൾ സ്വകാര്യ ബാങ്കിൽ ജോലി ചെയ്യുകയാണ്. മൃതദേഹത്തെ അനുഗമിച്ച് സഞ്ചരിച്ച് ഫലം നെഗറ്റീവ് ആയവരെയും ക്വാറൻൈറനിൽ ആക്കി. മാണ്ഡ്യയിലെ കൊവിഡ് 19 കേസുകൾ ഇതോടെ 10ൽ നിന്ന് 14 ആയി ഉയർന്നു.