അസിമ ചാറ്റര്‍ജിക്ക് ആദരമര്‍പ്പിച്ച് ഗൂഗിള്‍ ഡൂഡില്‍

ന്യൂഡല്‍ഹി: ആദ്യകാല ഇന്ത്യന്‍ ശാസ്ത്രജ്ഞയായ അസിമ ചാറ്റര്‍ജിക്ക് ആദമര്‍പ്പിച്ച് ഗൂഗിളിന്‍റെ ഡൂഡില്‍. അസിമയുടെ നൂറാം ജന്മദിനമായ സെപ്റ്റംബര്‍ 23 നാണ് ഗുഗിള്‍ അവരുടെ സ്‍മരണാര്‍ത്ഥം ‍ഡൂഡില്‍ അവതരിപ്പിച്ചത്.

ഇന്ത്യ ബ്രിട്ടന്‍റെ അധീനതയിലായിരിക്കുമ്പോള്‍ 1917ല്‍ കൊല്‍ക്കത്തയിലെ ഒരു മധ്യവര്‍ഗ കുടുംബത്തിലാണ് അസിമ ചാറ്റര്‍ജി ജനിച്ചത്. പ്രാഥമിക വിദ്യാഭ്യാസത്തിനുശേഷം 1938ല്‍ കല്‍ക്കട്ട സര്‍വകലാശാലയില്‍നിന്ന് അവര്‍ ഓര്‍ഗാനിക് കെമിസ്ട്രിയില്‍ ബിരുദാനന്തര ബിരുദം നേടി. ആറു വര്‍ഷത്തിനുശേഷം ഡോക്ടറേറ്റ് നേടിയ അസിമയാണ് ഇന്ത്യയില്‍ ആദ്യമായി ശാസ്‍ത്രത്തില്‍ പിഎച്ച്ഡി നേടിയ വനിത.



കല്‍ക്കട്ട സര്‍വകലാശാലയ്‍ക്ക് കീഴിലുള്ള ലേഡി ബ്രാബോണ്‍ കോളേജില്‍ കെമിസ്ട്രി വകുപ്പ് സ്ഥാപിച്ചത് അസിമയാണ്. ഇന്ത്യന്‍ ഉപഭൂഖണ്ഡത്തിലെ ചെടികളില്‍നിന്നുണ്ടാകുന്ന രാസസംയുക്തങ്ങളെക്കുറിച്ചായിരുന്നു അവരുടെ ഗവേഷണം പ്രധാനമായും കേന്ദ്രീകരിച്ചിരുന്നത്. മഡഗാസ്‍കര്‍ ദ്വീപിലെ ഒരു ചെടിയില്‍നിന്ന് ഉത്‍പാദിപ്പിക്കുന്ന രാസസംയുക്തത്തെക്കുറിച്ചുള്ള അസിമയുടെ പഠനം ക്യാന്‍സര്‍ രോഗികള്‍ക്കുള്ള മരുന്ന് കണ്ടുപിടിക്കുന്നതിലേക്ക് നയിച്ചു.

അപസ്‍മാരം, മലേറിയ എന്നിവയ്ക്കുള്ള നിരവധി മരുന്നുകള്‍ അസിമ കണ്ടെത്തിയിട്ടുണ്ട്. ഇന്ത്യയിലെ സസ്യങ്ങളിലെ രാസസംയുക്തങ്ങളെക്കുറിച്ച് 400 ഓളം റിസര്‍ച്ച് പേപ്പറുകള്‍ അവര്‍ പ്രസിദ്ധീകരിച്ചിട്ടുണ്ട്. 2002 നവംബര്‍ 22ന് അസിമ ചാറ്റര്‍ജി അന്തരിച്ചു.

Today's Google Doodle Honors Chemist Asima Chatterjee

Asima Chatterjee is the first Indian woman to earn a doctorate in science.