തെലങ്കാന തെരഞ്ഞെടുപ്പിൽ ഇടത് സ്ഥാനാര്‍ത്ഥി ട്രാന്‍സ്‌ജെന്‍ഡര്‍

തെലങ്കാന നിയമസഭാ തെരഞ്ഞെടുപ്പില്‍ മത്സരിക്കാൻ ഇക്കുറി ട്രാൻസ് ജെൻഡറും. സിപിഐഎമ്മിന്‍റെ ബഹുജന്‍ ലെഫ്റ്റ് ഫ്രണ്ട് മുന്നണിയുടെ സ്ഥാനാര്‍ത്ഥിയായിട്ടാണ് ആക്ടിവിസ്റ്റ് കൂടിയായ ചന്ദ്രമുഖി മുവ്വല മത്സരിക്കുന്നത്. ഹൈദരാബാദിലെ ഗോഷാമഹല്‍ മണ്ഡലത്തിന്‍റെ സ്ഥാനാര്‍ഥിയാണ്. ബിജെപി എംഎല്‍എ രാജാ സിങ്ങാണ് ചന്ദ്രമുഖിയുടെ എതിരാളി.

സിപിഐഎം സ്റ്റേറ്റ് സെക്രട്ടറി തമിനേനി വീരഭദ്രമാണ് സ്ഥാനാര്‍ത്ഥിപ്പട്ടിക പുറത്തുവിട്ടത്. ഹൈദരാബാദിന്റെ പേര് മാറ്റി ഭാഗ്യനഗര്‍ എന്നാക്കണമെന്നും വന്ദേമാതരം പാടാന്‍ താല്പര്യമില്ലാത്തവര്‍ ഇന്ത്യവിടണന്നും രാമക്ഷേത്ര നിര്‍മ്മാണത്തെ എതിര്‍ക്കുന്നവരുടെ തലകൊയ്യുമെന്നൊക്കെ പ്രസംഗിച്ചയാളാണ് രാജാസിങ്. അതിനാൽ തന്നെ രാജായ്ക്കെതിരെയുള്ള ചന്ദ്രമുഖിയുടെ സ്ഥാനാര്‍ഥിത്വം ഏറെ ശ്രദ്ധ നേടിയിരിക്കുകയാണ്.