ട്രാന്‍സ് ജെന്‍ഡര്‍ ആക്റ്റിവിസ്റ്റ് അക്കായി പത്മശാലിക്ക് ഡോക്ടറേറ്റ്

ബെംഗളൂരു: ഭിന്നലിംഗക്കാരുടെ അവകാശങ്ങള്‍ക്ക് വേണ്ടി പൊരുതുന്ന അക്കായി പത്മശാലിക്ക് ഡോക്ടറേറ്റ്. ഇന്ത്യന്‍ വെര്‍ച്യുല്‍ യൂണിവേഴ്സിറ്റി ഫോര്‍ പീസ് ആന്റ് എജ്യുക്കേഷനാണ് അക്കായിക്ക് ഹോണററി ഡോക്ടറേറ്റ് നല്‍കി ആദരിച്ചത്. ഇതാദ്യമായാണ് ഇന്ത്യയില്‍ ഭിന്ന ലിംഗത്തില്‍പ്പെട്ട ഒരാള്‍ക്ക് ഹോണററി ഡോക്ടറേറ്റ് ലഭിക്കുന്നത്.

പത്താം ക്ലാസുപോലും ജയിക്കാത്ത തന്നെ സംബന്ധിച്ച്‌ ഡോക്ടറേറ്റ് പോലുള്ള ബഹുമതി ലഭിക്കുന്നത് മറ്റു ഭിന്ന ലിംഗക്കാര്‍ക്കും പ്രചോദനമായി തീരുമെന്ന് പ്രതീക്ഷിക്കുന്നതായി അക്കായി കൂട്ടിചേര്‍ത്തു. ട്രാന്‍സ്ജെന്‍ഡറായി നിന്നുകൊണ്ട് ഡ്രൈവിങ് ലൈസന്‍സ് നേടുന്ന ഇന്ത്യയിലെ ആദ്യത്തെയാളുമായി അക്കായി. ഇക്കഴിഞ്ഞ നവംബറില്‍ കര്‍ണാടക സര്‍ക്കാര്‍ സംസ്ഥാനത്തെ ഒരുപൗരന് നല്‍കുന്ന രണ്ടാമത്തെ പരമോന്നതബഹുമതിയായ രാജ്യോത്സവ് പുരസ്കാരം നല്‍കി അക്കായിയെ ആദരിച്ചു. 2015 ല്‍ 'ഒന്‍ദെഡെ' എന്ന് സംഘടന അക്കായി ഭിന്നലിംഗക്കാര്‍ക്ക് വേണ്ടി ആരംഭിച്ചു.