കൊറോണക്കാലത്ത് ജനിച്ച കുഞ്ഞിന് 'കൊറോണ'യെന്ന് ഓമനപ്പേരിട്ട് ബംഗാൾ എംപി!

കൊറോണക്കാലത്ത് ജനിച്ച കുഞ്ഞിന് കൊറോണയെന്ന് ഓമനപ്പേരിട്ട് വിളിച്ച് ബംഗാളിലെ വനിതാ എംപി. തൃണമൂൽ കോൺഗ്രസ് എംപി അപരുപ പോഡ്ഡാറാണ് കുഞ്ഞിന് കൊറോണയെന്ന് ഓമനപ്പേരിട്ടത്. ബംഗാളിലെ അറംബാഗിൽ നിന്ന് തുടർച്ചയായി രണ്ട് തവണയായി പാർലമെൻറിലേക്ക് തിരഞ്ഞെടുക്കപ്പെട്ടിട്ടുള്ള എംപിയാണ് അപരുപ.

"ഞങ്ങൾക്ക് ഒരു പെൺകുഞ്ഞ് പിറന്നിരിക്കുന്നു. ഇത് ഞങ്ങളുടെ രണ്ടാമത്തെ കുഞ്ഞാണ്. കൊറോണക്കാലത്ത് ജനിച്ചതിനാൽ കൊറോണയെന്ന് അവളെ ഞങ്ങൾ ഓമനപ്പേരിട്ട് വിളിക്കും," അപരുപയുടെ ഭർത്താവ് മുഹമ്മദ് സാക്കിർ അലി പറഞ്ഞു. ജനിക്കുന്ന കുഞ്ഞിന് രണ്ട് പേരിടുന്ന രീതി ബംഗാളിലുണ്ട്. കുഞ്ഞ് ജനിച്ചാൽ ആദ്യം തന്നെ ഓമനപ്പേരിടും. പിന്നീട് കുടുംബത്തിലെ മുതിർന്ന ആളോ ഏറ്റവും ബഹുമാനമുള്ള ആരെങ്കിലുമോ ഔദ്യോഗികമായി കുഞ്ഞിന് പേരിടും.

Also Read: മാസ്ക് ധരിക്കാതെ ട്രംപ് മാസ്ക് ഫാക്ടറിയിൽ; എന്തൊരു ദുരന്തമാണിതെന്ന് സോഷ്യൽ മീഡിയ!

പശ്ചിമ ബംഗാൾ മുഖ്യമന്ത്രിയും തൃണമുൽ കോൺഗ്രസ് നേതാവുമായ മമത ബാനർജിയാവും കുഞ്ഞിന് ഔദ്യോഗികമായി പേരിടുക. മമതയോട് കുഞ്ഞിന് പേര് നിർദ്ദേശിക്കാൻ അഭ്യർഥിച്ചിട്ടുണ്ടെന്നും സാക്കിർ അലി പറഞ്ഞു. ഇതാദ്യമായല്ല, കൊവിഡ് 19 കാലത്ത് രാജ്യത്ത് കുഞ്ഞുങ്ങൾക്ക് വ്യത്യസ്തമായ പേരിടുന്നത്. മധ്യപ്രദേശിലെ ദമ്പതികൾ തങ്ങളുടെ ആൺകുഞ്ഞിന് ലോക് ഡൗണെന്നും ഉത്തർ പ്രദേശിലെ ദമ്പതികൾ തങ്ങളുടെ പെൺകുഞ്ഞിന് സാനിറ്റൈസർ എന്നും നേരത്തെ പേരിട്ടിരുന്നു.